UYanela Mbuthuma: ‘Yiqaqa’ kubalandeli, akaconsi ku-Ouaddou
Umqeqeshi we-Orlando Pirates, u-Abdeslam Ouaddou useveze ukuthi akafuni lutho ngomgadli wakhe uYanela Mbuthuma.
Unxusa abalandeli ukuthi bameseke lo mgadli nakuba edonsa kanzima phambi kwamapali muva nje.
UYanela Mbuthuma usedlale imidlalo eyisikhombisa yokugcina yeBetway Premiership ngaphandle kokubhakuzisa inethi.
Igoli lakhe lokugcina libe ngoFebhuwari ngesikhathi benqoba ngo 3-0 behlula iMarumo Gallants — futhi kusukela lapho, amathuba uwatholile kodwa lutho igoli.
Lesi somiso sesisuse ukukhathazeka kubalandeli bePirates ababona ukuthi lo mdlali oneminyaka engu-24 ubudala kumele ake anikwe ikhefu.
Kodwa u-Ouaddou akayizwa leyo. Ekhuluma ngaphambi komdlalo waMaZulu, ukubeke kwacaca ukuthi uYanela Mbuthuma yize amagoli engekho, kodwa usadlala indima ebalulekile eqenjini.
“Abalandeli kumele baqonde ukuthi uMbuthuma uyindodana yabo,” kusho u-Ouaddou.
“Ngakho kufanele bameseke futhi bamsize ukuze akwazi ukusiza iqembu.”
Naphezu kwesomiso sakamuva, izinombolo zikaMbuthuma zizonke zixoxa indaba ehlukile.
Useshaye amagoli ayisikhombisa futhi wasiza ekwakheni amathathu emidlalweni engu-24 kuyo yonke imiqhudelwano kule sizini.
U-Ouaddou uphinde wagqamisa ukuzikhandla kwalo mgadli okwenza iqembu likwazi ukuhlasela ngabanye abadlali.
“Wenza umsebenzi omuhle kakhulu,” kwengeza lo mqeqeshi. “Yebo, siyawadinga amagoli kuye, futhi azofika.
“Uma abalandeli bemkhombisa uthando nokumesek, ngiqinisekile ngo-100% ukuthi uzosisiza kakhulu.”
Njengoba ingcindezi ikhula futhi umjaho wesicoco ushuba, wonke amehlo azobe ekuYanela Mbuthuma ukugwinyisa amamsolayo amazwi abo.
IPirates izokwamukela AmaZulu e-Orlando Amstel Arena ngoMgqibelo kanti lo mdlalo weBetway Premiership uzoqala ngo-3 ntambama.
