Abekho abasefomini kwelePirates eliqala oweChamps League

Kubanadlali abathathu osekudonse amehlo ukungabonakali kwabo eqenjini le-Orlando Pirates eliqala umdlalo wayo weCaf Champions League.

IPirates izogadulisana ne-African Stars yaseNamibia emdlalweni womlenze wokuqala womzuliswano wesibili kweyokuhlunga.

Lo mdlalo useBotswana National Stadium, eGaborone ngoMgqibelo kanti uqala ngo-3 ntambama.

Umqeqeshi u-Abdeslam Ouaddou usememezele iqembu elizoqala lo mdlalo kanti kuthathe amehlo ukungabonakali kwabadlali abathathu abasefomini.

I-Orlando Pirates ifuna ukunqoba ukuze izibeke ethubeni elihle lokudlulela esigabeni samaqoqo.

Ezika-Ouaddou zingena kulo mdlalo zikhuthazekile ngemuva kokushaya iTS Galaxy ngo 3-0 ngoLwesibili.

UThalente Mbatha uqala endaweni kaThapelo Mokobodi esiswini. UMokobodi uqokwe njengomdlali ovelele ngoLwesibili.

UYanela Mbuthuma ubuyela endaweni yakhe phambili, ethatha indawo kaBoitumelo Radiopane oshaye igoli lokuqala ngesikhathi iPirates inqoba iGalaxy.

U-Oswin Appollis, ongomunye wabadlali abanamava kwi-Orlando Pirates naye akekho eqenjini.

IPirates ibophele kanje: Chaine, Sibisi, Seema, Ndaba, Sigomoshe, Selepe, Mbatha, Masilela, Moremi, Lungu, Mbuthuma.

Ebhentshini: Dladla, Hotto, Zulu, Mthiyane, Dansin, Padime, Kgositsile, Mabuza, Makgopa.