UMbokazi ubalwa kwabenza kahle kwiNdebe yoMhlaba

Isihlabani seBafana Bafana esikhula ngesivivini esimangalisayo, uMbekezeli Mbokazi uyaqhubeka nokugqama kwi-World Cup ka-2026.  

Lo mdlali wasemuva usefakwe ohlwini lwezitbha ezineminyaka engaphansi kuka-23 ezihamba phambili kulo mqhudelwano.

UMbokazi, oneminyaka engu-20 ubudala, ube ngomunye wabadlali abenze kahle kakhulu kwiBafana emidlalweni yokuqala yalo mqhudelwano odlalelwa eMelika, eCanada naseMexico.

Indlela adlale ngayo isiqalile ukuheha amehlo ezinhloli zamathalente nochwepheshe bebhola emhlabeni jikelele.

I-CIES Football Observatory imfake endaweni yesine ohlwini lwezitobha ezineminyaka engaphansi kuka-23 ezenza kahle ngemuva komjikelezo wokuqala wemidlalo yeNdebe yoMhlaba.

Lolu hlu lubheka izinto ezifana nokudla amabhola, ukuvimba ukuhlasela kwezimbangi, ukubamba amabhola nokuthi iqembu lingenelwe amagoli amangaki ngesikhathi umdlali esenkundleni.

U-Mbekezeli Mbokazi uthole le ndawo ngemuva kokudlala kahle kakhulu ngesikhathi iBafana ibhekene neMexico emdlalweni wokuvula i-World Cup.

Kulowo mdlalo unqobe izimpi zebhola ezinhlanu kweziyisishiyagalolunye, wawusa umhlola ekhaya amahlandla amane.

Unqamule umnyakazo wezimbangi kanye, wavimba ishodi elilodwa futhi wabuyisa ibhola kathathu.

Abadlali abamdlule kulolu hlu nguPaul Okon waseNew Zealand, uJonas Adjetey waseGhana noGavi waseSpain.

• FUNDA NALA | Ziyanda izinhlanhla kunozinti oxoshwe kwiNdebe yoMhlaba

Lokhu kuhlonishwa kuqinisa igama likaMbokazi njengomunye wezitobha ezisencane ezinekusasa eliqhakazile e-Afrika.

Njengoba iBafana Bafana isalwela ukufinyelela esigabeni somkhumulajezi, uMbokazi usephenduke omunye wabadlali ababaluleke kakhulu eqenjini likaHugo Broos.

• EZISHISAYO| Cofa lapha usithole kuWhatsApp