IPirates ‘ivikise’ uMzansi ihlazo kweyeCaf

 I-Orlando Pirates ivikise iNingizimu Afrika ihlazo emiqhudelwaneni yeCaf ngoLwesihlanu obeluzoba mnyama.

Lezi zinkunzi zaseSoweto zikhombise ukuzimisela kwazo kwiCaf Champions League, ziguqisa ompetha baseNamibia, i-African Stars, ngo 4-0 e-Orlando Amstel Arena.

Ukunqoba kwazo kuze ngosuku la ompetha beChampions League, iMamelodi Sundowns bebhuliswe amazolo, bekhishwa yiWiliete yase-Angola kulo mqhudelwano.

Ngalo uLwesihlanu, omakhelwane beBucs, iKaizer Chiefs nabo babhule amazolo kwiCaf Confederation Cup yiRed Arrows yaseZambia.

IBhakabhaka linqobe ngo 5-0 uma kuhlanganiswa imiphumela yemidlalo yomibili, ngemuva kokuwina ngo 1-0 emlenzeni wokuqala. 

Lokhu kulinike ithikithi lokuya esigabeni samaqoqo ngaphandle kokujuluka kakhulu.

UThapelo Mokobodi uvule amagoli ngomzuzu ka-17 ngemuva komnyakazo omuhle oqale kuThalente Mbatha noSimphiwe Masilela. 

Ngaphambi kwekhefu, uMasilela ube esephakela u-Evidence Makgopa ibhola elihle, lo mgadli walibeka enethini kwaba ngu 2-0. 

Ngesikhathi kuqala isiwombe sesibili, iPirates ayizange iyeke ukucindezela. 

• FUNDA NALA | Kwenzeke isimanga ePitoli iDowns ibhula amazolo

UMakgopa uphakele uMpho Padime elihle ibhola, lo mfana osemncane walinamathisela enethini ngobuchule oushiye abalandeli bebambe ongezansi.

Sekusele imizuzu eyishumi kuphele umdlalo, uMakgopa uphinde wabhala igama lwakhe kwabashaye amagoli.

• EZISHISAYO!| Cofa lapha usithole kuWhatsApp