U-Ouaddou ‘uvikele’ uMbuthuma esetha elizoqala oweChamps League

I-Orlando Pirates isalelwe yigxathu elilodwa okumele ilithathe ukuze idlulele esigabeni samaqoqo kwiCaf Champions League.

Kodwa umqeqeshi u-Abdeslam Ouaddou wenze izinguquko ezinkulu eqenjini elibhekene ne-African Stars yaseNamibia.

IBuccaneers izodlala umdlalo womlenze wesibili e-Orlando Amstel Arena ngo-8 ebusuku, isesimweni esihle ngemuva kokunqoba ngo 1-0 emlenzeni wokuqala ekuhambeni.

IPirates idinga nje ukugwema ukuhlulwa ukuze iqinisekise indawo yayo esigabeni samaqoqo.

U-Ouaddou ubonakala ezimisele ngokuphumuza abanye babadlali bakhe abavame ukuqala imidlalo.

Ukaputeni uNkosinathi Sibisi uphunyuziwe, kwathi uSbangani Zulu wathola ithuba lokuqala emuva maphakathi. 

UNkosikhona Ndaba yena uyaqhubeka nokudlala emuva ngakwesokunxele.

UDeon Hotto uqala ebhentshini njengoba iPirates ibhekene neqembu aqala kulo ukuzakhela igama ngakubo eNamibia.

Kodwa okugqame kakhulu ukungaqali kukaYanela Mbuthuma, osephinde wagxekwa ngemuva kokushweba amathuba amahle emdlalweni odlule.

UMbuthuma uzoqala ebhentshini, u-Evidence Makgopa ethola ithuba lokuhola ukuhlasela kwePirates.

• FUNDA NALA | IChiefs icacisa ukungabonakali kukaLeaner

Isinqumo sika-Ouaddou singabonakala njengendlela yokunciphisa ingcindezi ebhekene noMbuthuma, njengoba lo mgadli esephinde wagxekwa ngenxa yokungawasebenzisi kahle amathuba.

IPirates ibophele kanje: Chaine; Sigomoshe, Ndaba, Seema, Zulu; Selepe, Mokobodi, Mbatha; Masilela, Moremi, Makgopa.

Ebhentshini: Dladla, Derbyshire, Hotto, Mthiyane, Dansin, Padime, Kgositsile, Lungu, Mbuthuma.

• EZISHISAYO!| Cofa lapha usithole kuWhatsApp