UHunt ulindele umdlalo onzima kwiDurban City
U-Gavin Hunt uyazi ukuthi iStellenbosch FC izobhekana nomsebenzi onzima uma isivakashela iDurban City emdlalweni weCarling Knockout Cup ngoLwesithathu.
La maqembu azotholana phezulu emdlalweni womzuliswano ka-16, lapho iStellies izobe ilwela khona ukufinyelela emzuliswaneni wesibili kulo mqhudelwano okwesithathu kulandelana.
IStellenbosch, eyawina le ndebe ngo-2023, izophinde idlalele kude nasekhaya.
Imidlalo yayo eyisishiyagalombili edlule, eyisithupha ibiyingaphandle, nokuyinto uHunt avumayo ukuthi ibe nomthelela eqenjini lakhe elinabadlali abaningi abasebancane.
Lo mqeqeshi oneminyaka engu-62 ubudala uyayihlonipha iDurban City, athi yenze umsebenzi omkhulu ekuqiniseni iqembu layo.
“I-Durban City yenze umsebenzi omkhulu ngemuva kwesigcawu ngokuletha abadlali.
“Inomgogodla omuhle weqembu, inabadlali abanamandla futhi ngokujwayelekile imiphumela yayo eChatsworth mihle.
“Ngakho ngeke kube lula neze,” kusho uHunt.
Uphinde wavuma ukuthi ukudlala imidlalo eminingi ekuhambeni kube yinselelo kubadlali bakhe abasebancane.
“Kuhlukile ukudlala ekuhambeni kunokudlala ekhaya, lapho ungakwazi khona ukunikeza abadlali abasebancane amathuba kalula.
“Sineqembu elincane ngeminyaka, kanti ukudlala kaningi ekuhambeni kube nzima kwabanye babo.
“Kodwa bazofunda, futhi sijabule ngoba sinabadlali abasebancane abasezingeni elihle,” kusho yena.
Naphezu kwalezi zinselelo, u-Gavin Hunt usenethemba lokuthi iStellenbosch ingawunqoba lo mdlalo.
“Uma sidlala ngendlela efanele, sinamathuba alinganayo okunqoba.
“Sidinga nje ukuqinisa indlela esidlala ngayo njengeqembu. Uma sesikwazile lokho, ngiyalethemba kakhulu leli qembu,” kusho yena.
- FUNDA NALA | UMngqithi ubhoboka ngokumqhathwe neYanga
UHunt uthi iStellenbosch isazama ukwakha isiko elisha njengoba ilethe abadlali abaningi.
“Sisazama ukwakha isiko elisha neqembu elinabadlali abaningi abasha.
“Angikaze ngizwe sengathi isizini yethu isiqalile ngempela.
“Sesidlale imidlalo eyisishiyagalombili, futhi kube wuhambo olunzima, kodwa sinethemba futhi sijabule,” kuphetha yena.
- EZISHISAYO!| Cofa lapha usithole kuWhatsApp
