UKhanye uhlonza okukhube uSipho Mbule kwi-Orlando Pirates
UJunior Khanye usehlonze lokho akubona kube yisikhubekiso kwinqubekela phambili kaSipho Mbule kwi-Orlando Pirates.
Usola lo mdlali wasesiswini onekhono elihle ngokuba “yivila” nokudale ukuthi angafiki ezingeni abebhekwe kulo.
USipho Mbule ufike kwi-Orlando Pirates ethwelwe ngeqoma ngemuva kokukhombisa izimpawu ezinhle kwiSuperSport United, iMamelodi Sundowns neSekhukhune United.
Nokho akazange akwazi ukungena azinze eqenjini eliqala imidlalo njengoba edlale engu-12 kuphela kwiBetway Premiership.
UKhanye ukholwa ukuthi ukungaziphathi kahle kukaMbule nezinkinga zokulimala kumphazamisile.
“Isizini kaSipho Mbule ayizange ibe ngendlela ebengilindele ngayo,” kusho uKhanye kwiKickOff.
“Uqale umsebenzi wakhe kwi-Orlando Pirates kahle kakhulu kwiMTN8, kodwa wabe esehlaselwa wubuvila.”
Le nkakha eyazakhela igama kwiKaizer Chiefs ithi uMbule ukhululeke kakhulu ngemuva kokujoyina elinye lamaqembu amakhulu kuleli.
“Ngokuphazima kweso uSipho Mbule uvele wakhuluphala. Ukhululeke kakhulu ngemuva kokusayinwa yi-Orlando Pirates,” kuqhuba uKhanye.
“Ungelinye lamathalente ahamba phambili kuleli, kodwa ibhola lesimanje alibadingi abadlali abangazikhandli.”
Uqhube wathi ngenxa yalobu buvila bakhe, uMbule uzosala eqenjini lesizwe eliya kwiNdebe yoMhlaba.
Uthe ne-Orlando Pirates yanika uSipho Mbule inkontileka yonyaka owodwa ngoba isola ukuthi kukhona okungeke kuhambe kahle.
