Ezingezinhle kwiPirates ngo-Evidence Makgopa 

I-Orlando Pirates isithole izindaba ezimbi ngomgadli wayo, u-Evidence Makgopa.

Kuvela ukuthi uzohlala isikhathi esingangezinyanga ezimbili engadlali ngenxa yokulimala edolweni.

Lokhu kulimala kufike ngesikhathi esinzima njengoba uMakgopa ebeyingxenye ebalulekile yePirates neBafana Bafana. 

Manje kulindeleke ukuthi aphuthelwe imidlalo eminingi ebalulekile kule kilabhu neqembu lesizwe.

Lo mgadli oneminyaka engu-26 ubudala uthole lokhu kulimala ngesikhathi seNdebe yoMhlaba ka-2026.

NOkho waqhubeka nokudlala yize ebezwa ubuhlungu. Ubuye wadlala nangesikhathi amaqembu elungiselela isizini entsha.

Ngokubika kwe-iDiski Times, ngemuva kokuhlolwa odokotela kuthathwe isinqumo sokuthi aphumule isikhathi eside ukuze alulame ngokuphelele.

Okuhle wukuthi ukulimala kwakhe akudingi ukuhlinzwa. Nokho uzodinga isikhathi ngaphambi kokuthi abuyele enkundleni.

Lokhu kusho ukuthi mancane kakhulu amathuba okuthi abe yingxenye yeBafana Bafana emidlalweni yokuhlungela i-Africa Cup of Nations ka-2026.

Njengoba engekho, kulindeleke ukuthi uYanela Mbuthuma aqhubeke nokuhola ukuhlasela. 

• FUNDA NALA | UZwane ukhala ngesihlabani angenaso koweBucs

UBoitumelo Radiopane, uSebastian Pedersen noSifiso Luthuli nabo bazolwela amathuba ngesikhathi i-Orlando Pirates ilinde ukubuya kuka-Evidence Makgopa.

• EZISHISAYO| Cofa lapha usithole kuWhatsApp