Uzovuselela ibhola lakhe obuyele kwiChiefs
- Sibongiseni GUMBI
IKaizer Chiefs yemukele umdlali wayo wakudala, uNjabulo Blom, ozodlala kuleli qembu ngenkontileka yokubolekiswa.
Ubolekiswe yiqembu ashiya iChiefs waya kulo ngesikhathi engavumelani nayo ngomholo, iSt. Louis City FC yase-United States.
Lo mdlali oneminyaka engu-24 waqala umsebenzi wakhe webhola elikhokhelayo kuyo iChiefs ngo-2019.
Ngemuva kojoyina iMajor League Soccer ngoJanuwari ka-2023, uBlom uthole ulwazi olubalulekile phesheya.
Ukhombise ukukhula kakhulu waze wagcina engomunye wabadlali obekwakhelwa kubo iBafana Bafana.
Umqondisi weChiefs, uKaizer Motaung Jr. nguye owamukele uBlom ekubuyeni kwakhe.
“Sijabule ukwamukela uNjabulo ebuyela eqenjini,” kusho uMotaung Jr.
“Ulwazi lwakhe kwiMLS nokujwayelana kwakhe nemikhuba yeqembu kumenza abe yisinongo esibalulekile eqenjini lethu.
“Sibheke ngabomvu ukubona igalelo lakhe enkundleni ngoba siyazi ukuthi ubaluleke kangakanani endleleni yethu yokudlala.”
UBlom naye uveze ukuthakasela kwakhe ngokubuyela ‘ekhaya’.
“Ngijabule ngokubuyela kwiKaizer Chiefs, ikilabhu enendawo ekhethekile enhliziyweni yami,” usho kanje.
“Futhi ngibheke ngabomvu ukusebenzisana neqembu nokufaka isandla empumelelweni yethu ngaphansi komqeqeshi uNasreddine Nabi.
“Ukwesekwa ngabalandeli bekuhlezi kungigqugquzela, futhi angisakwazi ukulinda ukuphinde ngidlale phambi kwesizwe samaKhosi.”
