ElaseVietnam selimshaye nges’thende owodumo kwiChiefs
Umdlali owaqala ukuzakhela igama kwi-Kaizer Chiefs uNjabulo Blom usekhululiwe yiqembu abedlala kulo eVietman.
IThep Xanh Nam Dinh idedele lo mdlali engakaze adlale nakanye ngemuva kwesizini engazange imvume neze.
UBlom ujoyine iNam Dinh ekuqaleni kwesizini kulandela ukushiya kwakhe kwiSt. Louis City SC yakwiMajor League Soccer e-US.
Ujoyine iNam Dinh ehambisana nengwazi yeMamelodi Sundowns neBafana Bafana uPercy Tau ekuqaleni kwale sizini.
Kodwa-ke, akuzange kumhambele kahle lo mdlali oneminyaka engu-26 ubudala oqale ibhola elikhokhelayo kwi-Kaizer Chiefs.
Imibiko iphakamisa ukuthi uBlom ubenenkinga yokungabi nemvume yokusebenza kuleliya lizwe, waphinde waphazanyiswa ukulimala.
Esitatimendeni esifushane esikhishwe ngoLwesithathu, iNam Dinh ikuqinisekisile ukuhamba kukaBlom.
Ithe nguye nabanye abadlali abathathu abadedelwayo njengoba kuqala amalungiselelo esizini ezayo.
UBlom manje uzithola engenaqembu okwesibili amasizini elandelana.
Umnyakazo wakhe olandelayo awukacaci, kodwa kungenzeka abuyele kwiBetway Premiership.
Lo mdlali waphuma enkulisa ye-Kaizer Chiefs kanti uke wabuya kuyo ngesizini edlule ebolekiswe yiSt Louis City.
Nakhona kuMakhosi, obekubhekwe avuselele khona ibhola lakhe endaweni ayijwayele, akumhambelanga kahle.
