USebastian Pedersen uphawula ngokujoyina iPirates
Umdlali omusha we-Orlando Pirates useveze okwenze avumele phezulu uma leli qembu lifika lizomeshela ukuba azodlala kwiBetway Premiership.
Lezi zinkunzi zaseSoweto zenze isitatimende esikhulu emakethe yabadlali ngokusayinisa lo mgadli waseNorway obedlala kwiSogndal Fotball.
ISogndal yiqembu lesigaba sesibili sebhola elikhokhelayo eNorway.
Sekuvele ukuthi amaBhakabhaka akhokhe u-$289,500 (cishe u-R4.8 million) ukuze athole lo mgadli oneminyaka engu-27 ubudala.
U-Sebastian Pedersen ubesesele nezinyanga ezinhlanu kuphela kwinkontileka yakhe, okwenze iSogndal yavuma ukuxoxisana ne-Orlando Pirates ngaye.
Kuthiwa iPirates ibeke isiphakamiso esihle, ikakhulukazi emholweni nasemigomeni yenkontileka, okumenze wavuma ukuthuthela eNingizimu Afrika.
Lo mgadli osebenzisa unyawo lwesobunxele ufika ethwelwe ngeqoma kweziMnyama njengoba amavidiyo akhe edlala ekhoma ukuthi ubukhali.
Kule sizini ubeseshaye amagoli ayisishiyagalombili, wakhela ozakwabo amabili emidlalweni engu-14, okusho ukuthi ube negalelo kumagoli angu-10.
Ekhuluma nabezindaba beSogndal, uPedersen uthe leli bekuyithuba angakwazanga ukulidedela.
“Ngibona sengathi leli yithuba elivela kanye empilweni,” kusho yena.
“I-Orlando Pirates iyiqembu elikhulu kakhulu, ngakho angikwazanga ukulidedela.
“Ekuqaleni benginokungabaza, kodwa ngesikhathi ngifunda kabanzi ngeqembu nangempilo yaseNingizimu Afrika, ngijabule kakhulu.
“Ngiyabonga ngokuthi iSogndal nePirates bafinyelele esivumelwaneni ngokushesha.”
- FUNDA NALA | OweScottland uveza isifiso ngebhola laseZimbabwe
Ukusayinwa kuka-Sebastian Pedersen sekuvele kususe isasasa elikhulu kubalandeli be-Orlando Pirates asebebheke ngabomvu ukumbona enkundleni.
- EZISHISAYO| Cofa lapha usithole kuWhatsApp
