U-Ouaddou uveza akhala ngakho ngesikwati sePirates
Umqeqeshi we-Orlando Pirates, u-Abdeslam Ouaddou, usedalule ukuthi akathandi ukusebenza neqembu elinabadlali abaningi kakhulu.
Lokhu ukusho nje iPirates njengamanje inelinye lamaqembu amakhulu kwiBetway Premiership.
IPirates iqale ukuvikela isicoco sayo seBetway Premiership ngokushaya iMilford FC ngo 2-0 e-Orlando Amstel Arena ngoMgqibelo ntambama.
Amagoli ka-Oswin Appollis noTshepang Moremi aqinisekise ukuthi iBucs iqala isizini ngamaphuzu amathathu.
Ngemuva kokuphela kwesizini edlule, iPirates isayine abadlali abayisishiyagalolunye.
Kukho kukhona uNeo Rapoo, uMatome Mmolai, uGhampani Lungu, uMthetheleli Mthiyane, uSbangani Zulu, uBohlale Ngwato, uThapelo Mokobodi noSebastian Pedersen.
Yize ikhulule abadlali abangaphezu kuka-10 kuleli windi lokudayiselana, kusabikwa ukuthi iPirates isenabadlali abangu-41 emabhukwini ayo.
Ekhuluma ngalesi simo se-Orlando Pirates, u-Abdeslam Ouaddou uthe ukusebenza neqembu elinabadlali abaningi kunzima.
“Uma sidlala yonke imiqhudelwano efana neBetway Premiership, iCaf Champions League, iMTN8, iCarling Knockout Cup neNedbank Cup, abadlali abangu-30 banele.”
Uthe yena uthanda ukuba nabadlali basenkundleni abangu-30 kanye nonozinti abane kuphela.
“Kimina abadlali abangu-30 nonozinti abane benza u-34. Lokho kwanele ukubhekana nokulimala nokumiswa kwabadlali.
“Uma sekuwedlule ku-35 kuba nzima ukusebenza kahle ngoba awusakwazi ukunaka wonke umuntu ngendlela efanele.”
Lo mqeqeshi uphinde waveza ukuthi iqembu elikhulu lidinga nezinsiza ezisezingeni eliphezulu.
“Kudingeka nethimba labaqeqeshi elanele nezinkundla okungenani ezimbili zokuziqeqesha ukuze umsebenzi uhambe kahle,” kuchaza yena.
- FUNDA NALA | UMofokeng uphawula nggephenathi yakhe
Njengoba eseqale kahle, u-Abdeslam Ouaddou kubhekwe lukhulu kuye ne-Orlando Pirates kule sizini.
- EZISHISAYO| Cofa lapha usithole kuWhatsApp
