Sekuseduze uCristiano Ronaldo adlale nendodana yakhe

Ezindabeni ezinyakazise umhlaba wonke, sekuvele ukuthi uCristiano Ronaldo angase aqophe omunye umlando ebholeni.

Lokhu kuzokwenzeka uma kufezeka iphupho elidala lalesi sihlabani sokudlala nendodana yaso uCristiano Ronaldo Jr eqenjini elilodwa esigabeni esikhokhelayo.

Imibiko evela eSaudi Arabia iphakamisa ukuthi i-Al Nassr icabanga ukukhuphulela uCristiano Jr eqenjini elikhulu ngesizini ezayo.

Uma lo mfanyana oneminyaka engu-15 ubudala ekhushulwa, kungaqopheka umlando wokuba uyise nendodana babonakale enkundleni ngesikhathi esifanayo. 

UCristiano Junior ubukeka elandela ezinyathelweni zikayise njengoba enza kahle ezinhlakeni zokukhuliswa kwamakhono. 

Uvelele ezinhlakeni zabadlali abasebancane kusukela kwiReal Madrid, iJuventus, neManchester United.

Ukukhula kwakhe bekulokhu kuqashwe ngeso lokhozi. Manje njengoba eseneminyaka engu-15, kubukeka esezobekwa emehlweni omhlaba ngokugcwele.

Ukukhushulelwa kwakhe kwelinye lamaqembu amakhulu ebholeni leSaudi Pro League yisinyathelo esikhomba ukwethenjwa nobukhulu bekhono lakhe.

• FUNDA NALA | Okumincelwe uNcikazi ngeChiefs kwidabhi

UCristiano Ronaldo – oseneminyaka engu-41 ubudala kade akusho ukuthi engajabula ukudlala nale ndodana yakhe ngaphambi kokuwabeka ethala amakhokho. 

• EZISHISAYO | Cofa lapha usithole kuWhatsApp