Badlale kanjani abasha kwiKaizer Chiefs? UKhan uyahlaziya
I-Kaizer Chiefs ihlulwe ngo 2-1 yiSBV Vitesse emdlalweni wayo wokuqala wokuzizwa amandla njengoba isekhempini eNetherlands.
Kodwa lowo owake waba yiphini lomqeqeshi kuleli qembu, uFarouk Khan uthi kumele kugxilwe ekuthuthukisweni kweqembu, hhayi imiphumela.
IChiefs ibizihola phambili ngesikhathi kuyiwa ekhefini ngegoli elihle likaReeve Frosler.
Kodwa izinto zijikile esiwombeni sesibili iVitesse yabuya ngamandla yashaya amagoli amabili, yanqoba lo mdlalo.
Yize lo mphumela ungehlanga kahle kubalandeli be-Kaizer Chiefs, uKhan ugcizelela ukuthi awungathathelwa phezulu.
Abadlali abasha, oThabiso Monyane, uFlavio da Silva, u-Ethan Chislett, noNkanyiso Shinga badlale okokuqala ngaphansi kukaNasreddine Nabi.
Kumele kuqapheleke ke ukuthi lo mqeqeshi odabuka eTunisia usalibumba kabusha iqembu lakhe elungiselela umkhankaso ka-2025/26.
“Imiphumela yemidlalo yokuzwana amandla ngaphambi kwesizini ayisho lutho, kusho uKhan kwabeKickOff.
“Lesi yisikhathi sokuqinisa abadlali nje, ukwenzela ukuthi babe segiyeni eliphezulu uma sekuqala iligi.”
UKhan uhlabeke umxhwele kakhulu nguNkanyiso Shinga odlala kwesokunxele emuva futhi ongene ngesiwombe sesibili.
“Ubebukeka sengathi uzoqinisa kahle impela emuva kwesokunxele. Kubadlali abane abasha, uShinga uyena ongihlabe umxhwele.”
Ngokuqondene nabanye, uKhan uveze lokhu:
- UFlavio Da Silva: “Usebenze kanzima futhi ubenomfutho, kodwa asazi noma angakwazi yini ukushaya amagoli ngokungakhawuki.”
- U-Ethan Chislett: “Angizange ngingihlabe umxhwele ngaye. Ubebukeka elahlekile. Kuyisinyathelo esikhulu ukusuka kumaligi aphansi e-England eze kuleli zinga.”
- UThabiso Monyane: “Wenze kahle, kodwa akazange akuthole ukucindezeleka ukuze simbone kahle.”
UKhan uphinde waxwayisa ngokuhlaziya ngokweqile lo mphumela, wathi iVitesse isanda kudliwa yizembe ngakho yakha kabusha.
I-Kaizer Chiefs manje izobhekana nembangi eqinile nokulindeleke iyithwalisa kanzima kwiFC Utrecht ngoLwesihlanu.
Leli qembu liqede endaweni yesine esigabeni esiphezulu eNetherlands, i-Eredivisie ngesizini edlule.
Lowo mdlalo kulindeleke ukuthi uveze isithombe esicacile sokuthi Amakhosi umi kuphi emalungiselelweni awo.
Umbono kaKhan ophelele: Kuseyizinsuku zokuqala, kuyathembisa, kodwa kusenomsebenzi omningi ohlalele uNabi kule-Kaizer Chiefs entsha.
