OwoKhozi ucikeke waduba ukujima kuwina iPirates

Umsakazi odumile woKhozi FM nongumlandeli wokuqina weKaizer Chiefs ucikeke wahluleka nawukuqhubeka nezinhlelo zakhe kuwina i-Orlando Pirates.

EziMnyama zishaye iSekhukhune United okwesibili kulandelana emiqhudelwaneni ehlukene ngoLwesibili.

Ziyishaye ngo 1-0 kwiMTN8 ngempelasonto, kwathi ngoLwesibili kwaba u 2-0 emdlalweni weBetway Premiership. 

Kwividiyo ayifake ekhasini lakhe elimthethweni leFacebook, uKhathide “Tshatha” Ngobe uveze ukucikeka kwakhe ngalo mphumela. 

“Yazi njengoba ngihleli lapha nje, kumele ngabe ngingene ejimini ngiyajima,” kusho uTshatha.

Kuyacaca ke ukuthi naye ungomunye woS’duma Ngabanye abahlale bebatshazwa uReggie “Mapensela” Ndlovu uma esakaza imidlalo emikhulu. 

“Inhliziyo yami ibuhlungu kabi… (Empeleni) Ayibuhlungu, ngenyanyile nje. Ngicikwa yileli qembu okuthiwa iSekhukhune.

“Lesi Sekhukhune, ake ningitshele. Lesi Sekhhukhune okusho ukuthi ngampela sizimisele ukudliwa yilaba. 

“Naba olokhunja. Nali leli qembu eligqoka okumnyama nokumhlophe… Ngiyalikhohlwa negama lalo. 

“Manje bafuna ukudliwa yileli qembu bona. Okushisho bazodliwa yileli qembu kathathu ezinsukwini eziyisikhombisa. Hhay’bo nasi iSekhukhune bo!”

Ubabaza kanjena nje uTshatha i-Orlando Pirates izobe ibheke ukuphinde iyishaye iSekhukhune emdlalweni womlenze wesibili weyandulela owamanqamu kwiMTN8. 

• FUNDA NALA | Inkakha iveza umehluko kuMbuthuma noRadiopane

Lo mdlalo uzoba ngoMgqibelo e-Olrando Amstel Arena ngoMgqibelo kanti iBabina Noko izobe ingenaye umqeqeshi wayo uCedric Kaze okhishwe ngekhadi elibomvu. 

• EZISHISAYO| Cofa lapha usithole kuWhatsApp