USukazi uchaza eyokususa isithombe esiveza iPirates ‘igwaza’

Usihlalo weTS Galaxy, u-Tim Sukazi, useveze ukuthi kungani ephoqe ithimba lezokuxhumana lekilabhu yakhe ukuthi lisuse isithombe ebesigcona i-Orlando Pirates.

Lesi sithombe besikhombisa isikhulu sePirates, uThandi Merafe siphethe imvelophi sihubha uSukazi, obekukhomba ukuthi sifuna ‘ukumgwazela’.

Lesi sithombe esenziwe nge-AI sishicilelwe ngaphambi komdlalo walamaqembu ngoLwesibili.

“Ngithe ngisibona leso sithombe, ngabiza ithimba lami ngabuza ukuthi liyichaze le nto,” kusho uSukazi kwiSports Nights Amplified kwiMetro FM.

Leli thimba lazivikela ngokuthi belikhumbuza abantu ngomdlalo iPirates eyashaya kuwo iGalaxy ngo 6-0 ngesizini edlule.

Abalandeli ezinkundleni zokuxhumana baveza izinsolo zokuthi iPirates yayiwuthengile lo mdlalo ngenxa amanye amagoli angena ngayo. Buka isithombe ngezansi.

Lichaza ithimba lezokuxhumana leGalaxy, lathi belisebenzisa lezo zinkulumo ukuze livuse isasasa ngaphambi komdlalo wangoLwesibili.

Nokho, u-Tim Sukazi akazange avumelane nalokho, ekubona sekungekhona ukugcona i-Orlando Pirates, kodwa sekwedlulele.

“Ngathi, ‘Ngicela nisisuse.’ Basisusa. Baphinde bathi, ‘Kodwa sihlalo.’ Ngathi, ‘Lapha nenze kakhulu,’” kuchaza uSukazi.

Lesi sithombe sasuswa ngaphambi komdlalo wangoLwesibili, iPirates ewunqobe ngo 3-0.

• funda nala | UDA CRUZ UHAMBE NECHIEFS IXHUGELA

Lesi sigameko siveza ukuthi kukhona umugqa phakathi kokugconana okujwayelekile ebholeni nokushicilela izinto ezingathathwa njengezinsolo zokungaziphathi kahle.

• ezishisayo| COFA LAPHA USITHOLE KUWHATSAPP