Inkakha iveza umehluko kuMbuthuma noRadiopane
Impikiswano ngokuthi ubani okufanele ahole ukuhlasela kwe-Orlando Pirates phakathi kukaYanela Mbuthuma noBoitumelo Radiopane isishube kakhulu.
Lokhu kwenzeke ngemuva kokuthi uRadiopane elibambe ngazo zombili ithuba emdlalweni weSekhukhune United ngoLwesibili.
Njengoba uMbuthuma eebephunyuziwe, uRadiopane nguye oqale njengomgadli.
Ushaye igoli lokuqala waphinde waphakela u-Oswin Appollis eihle ibhola ukuze ashaye elesibili ngesikhathi iPirates inqoba ngo 2-0.
UMbuthuma nguyena mgadli okubukeka ethandwa kakhulu ngumqeqeshi u-Abdeslam Ouaddou kusukela kuqale isizini.
Kodwa kuze kube manje, usahlulekile ukubhakuzisa inethi, osekumfakele ingcindezi enkulu.
Ingwazi yePirates uBenedict “Tso” Vilakazi isiveze umbono wayo ngokuthi yini ehlukanisa u-Yanela Mbuthuma no-Boitumelo Radiopane.
“URadiopane uyilokho esikufunayo kumgadli,” kusho le nsizwa eyaziwa ngelikaTso ebholeni.
Boitumelo Radiopane vs Yanela Mbuthuma: Ubani ongcono?
UVilakazi uthe umgadli angasiza iqembu ngezindlela eziningi, kodwa umsebenzi wakhe omkhulu awuguquki – ukushaya amagoli.
“Ungazenza nezinye izinto,” kuqhuba uVilakazi. “Ungasiza iqembu uma lilahlekelwe yibhola, ugijime udonse izitobha ukuzeuvulele abanye izikhala.
“Lokho kuhle konke. Kodwa khumbula ukuthi umsebenzi wakho omkhulu ukushaya amagoli.
“Yingakho kwesinye isikhathi ngiyaye ngizibuze ngithi, ‘Umsebenzi wakho ukushaya amagoli, uyawashaya na?’”
Uthi uma impendulo ingu-cha, iqembu kufanele lifune omunye ozokwenza lowo msebenzi.
“Uma impendulo ingu-cha, kusho ukuthi kumele sithole omunye ozokwenza umsebenzi,” kusho le nkakha.
U-Yanela Mbuthuma ushwebe amabhola alula
UVilakazi uthe igoli likaRadiopane liveze umuzwa wangempela womgadli.
“Bheka igoli lokuqala. Ungene esikhaleni, yebo, uhlulekile ukulibamba kahle ibhola,” kuchaza yena.
“Kodwa into engiyithandile ukuthi uyazi ukuthi amapali akuphi.
“Noma ibhola engalibambanga kahle, ukwazile ukukhahlelela ipali.”
Kulowo mzuzu, uVilakazi uthi ubone umehluko phakathi komgadli ojwayelekile nomgadli onekhono lokuhogela igoli.
“Lona umuzwa womgadli. Ukuthi, ‘Ngiyazi ukuthi amapali akuphi, ngizokhahlela uma ngilana.’
“Yilokho esikufunayo,” kuwengeza uTso. “Yebo, yenza nezinye izinto, kodwa sifuna ukubona lowo muzwa. Uyakwazi yini ukuhogela igoli?”
U-Boitumelo Radiopane ukhombise ukuvuthwa
UVilakazi ube eseqhathanisa lokhu okwenziwe uRadiopane nokwenziwe uMbuthuma emidlalweni edlule.
“Le yinto uMbuthuma angakwazanga ukuyenza,” kuqhuba le ngwazi.
“Kwesinye isikhathi uzithola esesimweni esihle kakhulu, kodwa ahluleke ukukhahlelela ipali.”
Uthe abalandeli kumele baqhathanise amathuba ashwetshwe u-Yanela Mbuthuma naleli goli elishaywe u-Boitumelo Radiopane.
“Cabanga nje ngawo wonke amathuba ashwetshwe uMbuthuma bese uwafanise negoli likaRadiopane. Uzobona umehluko.”
UVilakazi akagcinanga ngokuncoma ukushaya igoli kuphela, kodwa uphinde wancoma indlela uRadiopane aphasele ngayo u-Appollis ukuze ashaye elesibili.
“Lokho kukhombise ukuvuthwa,” kuqhubeka yena. Uthe abadlali bafundiswa besebancane ukubheka izinketho zabo ngaphambi kokuthatha isinqumo.
“Uma uzithola usendaweni ethile, kufanele uphakamise ikhanda. Uma kungekho muntu, uthathe isinqumo.
“Ngesikhathi ephethe ibhola, uphakamise ikhanda, wabona u-Appollis esesimweni esingcono, wamdlulisela ibhola. Kube kuhle kakhulu.”
- EZISHISAYO| Cofa lapha usithole kuWhatsApp
