Isitobha esinamava siphelelwa yindawo kwi-Orlando Pirates
Kubikwa ukuthi i-Orlando Pirates inqume ukungayivuseleli inkontileka yomunye wabadlali bayo basemuva abanamava.
Ngokwemithombo esondelene neqembu, lo mdlali oneminyaka engu-31 ubudala kulindeleke ukuthi bahlukane ekupheleni kwale sizini.
Yize izingxoxo zokuqala mayelana nokuvuselelwa kabusha bezihlelelwe inyanga edlule, kubikwa ukuthi zigcine zingenzekanga.
Lokhu bekungemuva kokuba ithimba labaqeqeshi nabaphathi bephothule izinhlelo zabo zeqembu ngesizini ka-2026/27 kanti lo mdlali ubengeyona ingxenye yalo.
UDLIWE YIZEMBE LIKA-OUADDOU
Selokhu kufike umqeqeshi u-Abdeslam Ouaddou, uBandile Shandu uzithole engeseyena umdlali obaluleke kangako eqenjini.
Lo mdlali ongowokuzalwa eMgungundlovu usadlale imidlalo emine kuphela kuyo yonke imiqhudelwano kule sizini.
Ulandela ngemuva kwethalente elisha labadlali abanga nabo indawo abasanda kujoyina iqembu.
I-Orlando Pirates inabadlali abahle emuva kwesokudla, kanti njengamanje uShandu ulandela ngemuva kwalaba:
- UDeano van Rooyen: Lowo owayengukaputeni weStellenbosch FC nguye isethenjwa kule ndawo njengamaje.
- UThabiso Lebitso: Kuthiwa uthandwa kakhulu ngenxa yokuqonda kwakhe kahle amaqhinga nesivinini sakhe.
- UKamogelo Sebelebele: Isihlabani esisafufusa sesihlabe umxhwele u-Ouaddou ngekhono laso elihlangene nejubane.
- USiyabonga Ndlozi: Kukhona noNdlozi okumanje ubolekiswe kwiMagesi FC ukuze athole amava
- Abasalindile: IPirates inethemba elikhulu ngoTshepo Mashiloane, okumanje uthola amava kwiSekhukhune United abolekiswe kuyo.
IMPAMBANAMGWAQO
UShandu ujoyine i-Orlando Pirates esuka kwiMaritzburg United (manje esiyiDurban City) ngoJulayi 2021.
Ubengumdlali obalulekile ngesikhathi somkhankaso wekilabhu wokunqoba izindebe ezimbili ngo-2022/23.
Waziwa ngobuhlakazi bokukwazi ukuyongena ebhokisini lezimbangi nokukwazi ukushaya amagoli abalulekile.
Ukuhamba kwakhe kubonisa ukushintshela kweqembu kubadlali abasebancane, abasozasiza iqembu isikhathi eside.
“Indawo yasemuva kwesokudla inabadlali abaningi futhi bonke bangaphambi kwakhe kanti bahle kakhulu.
“Baphinde babe nabadlali abasebancane abahle… sebenqume ukumdedela,” kucashunywe umthombo usho kanje kwiPhakaaathi.
YINI ELANDELAYO?
Njengoba eneminyaka engu-31, uShandu uzotholakala mahhala kanti akufanele aliswele iqembu elizomsayina ngenxa yokuziphatha kahle kwakhe.
Usedlale imidlalo ecela ku-200 kanti akukaze kuvele izinto ezingezinhle ngaye kusukela eqale ukudlala ibhola elikhokhelayo.
Amahlebezi aseqalile ukumhlanganisa nokubuyela ezimpandeni zakhe KwaZulu:
- IDurban City (eyayiyiMaritzburg United): Ukubuyela eqenjini azakhele igama kulo kungaba yinto ezimbuyisela ukuzethemba.
- AmaZulu FC: Njengoba u-Arthur Zwane efuna abadlali abanamava, uShandu ubukeka engangena khaxa eqenjini lakhe.
- IGolden Arrows: UManqoba Mngqithi ubelokhu ebazisa abadlali basemuva abakhaliphile, okwenza i-Arrows ibe yiqembu angaphelela kulo.
FUNDA NALA | Ezintsha ngoMabasa osekhonjwa kwiChiefs
Nakuba ukuphuma kukaShandu kungase kube nzima kubalandeli, kuvumela i-Olrando Pirates ukuthi ivuselele iqembu layo kabusha.
Kuyaziwa ukuthi amaqembu avame ukuvuselela izikwati zawo ngemuva kwezikhathi ezithile ukuze aqinisekise ukuthi anabadlali abasalambele impumelelo.
