Isihlabani seBafana uLyle Foster ubuyela kwiPremier League 

• Intatheli yeLISENETHINI

Iqembu elisanda kukhushulelwa kwiPremier League e-England, i-Ipswich Town kubikwa ukuthi lisezingxoxweni zokubolekwa umgadli uLyle Foster.

Lo mgadli weBafana Bafana ukwiBurnley ezodlala kwiChampionship kule sizini kulandela ukudliwa yizembe ngesizini edlule. 

UFoster, oneminyaka engu-23, udlale indima ebalulekile ekusizeni amaClarets ukuthi abuyele kwi-English Premier League ngesizini ka-2022/23, kodwa izinto zafike zasheshe zayibhedela kulesi sigaba esiphezulu yabuyela kwiChampionship.

I-Ipswich, ebuyele kwiPremier League ngemuva kweminyaka engu-22, isebhekane nokuhlulwa kanzima yiLiverpool nompetha abavikela iligi iManchester City.

Khonamanjalo, umgadli waseNingizimu Afrika, uFoster, kumanje ungumdlali obiza kunabo bonke abakuleli. 

Kule sizini, uFoster usevele udlale imidlalo emithathu kwiChampionship ngaphansi komqeqeshi omusha weBurnley, uScott Parker. 

Udlale imidlalo engu-24 kwiPremier League ngesizini edlule, washaya amagoli amahlanu. 

Inkontileka yakhe kwiBurnely izoze iphele nguJuni 2028, okwenza ukuthi iqembu elifuna ukudayiselwa yena kudingeke lize nemali ebhekile.

Njengoba iwindi lokudayiselana ngabadlali livalwa ngoLwesihlanu luka-Agasti 30, isikhathi sokuphothulwa kwesivumelwano siyancipha.

Khonamanjalo, uFoster uzojoyina ozakwabo beBafana ngoMsombuluko eGoli.

OLUNYE UDABA: Uncoma ukuvuleka kwamasango akuma-Arab uNomvete

Phela eyingxenye yeqembu likaHugo Broos labadlali abangu-23 elizodlala ne-Uganda neSouth Sudan kweyokuhlungela i-Afcon ka-2025.