‘Omagay’azidlele’ iPirates ivuke ngomunye uMofokeng
I-Orlando Pirates isiphenduke omagay’azidlele ngomqhudelwano wayo osuphenduke isivovo sokuzihluzela ithalente elisha eliselincane.
Leli qembu laseSoweto liba nomqhudelwano wansukuzonke wamaqembu abafana namantombazane asemancane owaziwa ngePirates Cup.
Ekusungulweni kwayo le ndebe bekumenywa amaqembu aphesheya, kodwa manje sekuba ngawakuleli kanti kula iPirates ihlomula khona ngethalente.
URelebohile Mofokeng, osephenduke omunye wezethenjwa kulezi ziqhwaga zaseGoli wavundululwa kuwo lo mqhudelwano.
Manje sekuvela ukuthi i-Orlando Pirates isiphinde yathola omunye okuthiwa angase alandele ezinyathelweni zikaMofokeng.
IPirates Cup beyibanjwe ngempelasonto yePhasika kanti ngokubiika kweKickOff, kunabadlali abambalwa abantshontse iso labahlwayi beBucs.
Nokho obatshazwa kakhulu ngumgadli oneminyaka engu-17 obephekwa enkulisa kaJames Mothibi owayedlala kuyo i-Orlando Pirates kudala.
Kuthiwa uRethabile Ramoenteli ukhombise ikhono elimangalisayo futhi waqokwa njengomdlali ovelele kulo mqhudelwano.
“Lowa mfana uya kwiPirates. Uzodlala eqenjini layo leDStv Diski Challenge.
“Uneminyaka engu-17 nje kuphela njengamanje,” kucashunwe umthombo usho kanje.
“Okwamanje uzongena ngenkontileka yenkulisa. Kodwa ngengikubone kuye kwiPirates Cup, uzoba yinto enkulu maduze nje.
“Indlela adlala ngayo icishe ifane nekaRelebohile Mofokeng. Badlala indawo efanayo, bayalingana futhi bacishe bafane.
“Ungafunga uthi bangamawele uma unganakile,” kuqhuba lo mthombo uncoma uRamoenteli.
Kuthiwa bakhona nabanye abadlali iPirates ebanombolile kulo mqhudelwano okungenzeka bathathwe bafakwe ezinkulisa zeqembu.
Ngonyaka odlule yathatha uDimpho “Khalabemgeza” Madalane okumanje useqenjini layo leDDC.
Naye waqokwa waba ngumdlali ovelele njengoba ayefike ne-eMalahleni United kulo mqhudelwano.
Abanye abaphuma kuwo ngunozinti uSiyabonga Dladla odlala eqenjini lenkulisa yePirates elidlala kwi-ABC Motsepe League iPele Pele FC.
