Indodana kaDJ Cleo isisondele ekufezeni iphupho kwiPirates

UZoey Monyepao – oyindodana yomculi nomsakazi uDJ Cleo, kuvela ukuthi ingase ithole inkontileka eqenjini elikhulu le-Orlando Pirates.

Lo nozinti oneminyaka engu-22 ubudala udlale okokuqala eqenjini elikhulu ngoLwesithathu.

Lokhu kwenzeke emdlalweni wobungani neLas Palmas yaseSpain la esebenze khona kahle.

Ngemuva kokuhlulwa yi-Al Ittihad ngo-3-2, iPirates yenze izinguquko eziningi eqenjini.

USiyabonga Dladla uqale njengonozinti. Ngesikhathi umdlalo usuphakathi, uZoey Monyepao ungene endaweni kaDladla.

Akazange abe nomsebenzi omningi njengoba iPirates bekuyiyo ehlasela kakhulu.

Ekugcineni uBoitumelo Radiopane washaya igoli lokuwina. IPirates yanqoba ngo-1-0.

Nokho, le ndodana ka-DJ Cleo ike yaba nengcindezi iLas Palmas iyihlasela kabi.

Umnyango wonozinti kwiPirates usushintshe kakhulu kulandela ukuhamba kukaMelusi Buthelezi.

Kubukeka sengathi uDladla usehamba phambili ekubeni yiphini likaSipho Chaine ngesizini ezayo.

Lokho kwenza uMonyepao abonakale esesondele kakhulu eqenjini elikhulu.

Kubikwa ukuthi usephambi kuka-Ethan Visagie emjahweni wokuthola inkontileka.

• FUNDA NALA| Kuvela okuvimba uMabasa kwiPyramids

UVisagie ubedlalela iqembu lePirates elidlala ku-ABC Motsepe League ngesizini edlule.

Uma uZoey elithola ithuba lokudlala esigabeni esikhokhelayo, uzobe efeze isifiso sika-DJ Cleo owake wazama ukungena ebholeni esedumile emculweni.

• EZISHISAYO| Cofa lapha usithole kuWhatsApp