UMngqithi uchaza ekaMudau noMokoena kwiDowns
- Sibongiseni GUMBI
Umqeqeshi weMamelodi Sundowns, uManqoba Mngqithi, usecacise ukushiya ngaphandle abadlali abamqoka oTeboho Mokoena noKhuliso Mudau esikwatini semidlalo yakamuva.
Bobabili laba badlali, abangabadlali abaphambili kwiSundowns naseqenjini lesizwe laseNingizimu Afrika, abazange babonakale ngesikhathi iqembu linqoba ngo 2-0 kwiSuperSport United.
Ekhuluma nezintatheli, uMngqithi ukugcizelele ukuthi asikho isizathu esijulile sokushiywa ngaphandle kwalaba badlali.
Esikhundleni salokho, lesi sinqumo besiyingxenye yezinhlelo zokubaphumuza.
Kuzokhumbuleka ukuthi bobabili uMokoena noMudau badlale kabili kwiBafana Bafana ngesikhathi sekhefu lamazwe ngamazwe muva nje.
UMngqithi ugcizelele ukubaluleka kwabo eqenjini, waqinisekisa ukuthi basazobuya emidlalweni ezayo.
“Bangabadlali ababaluleke kakhulu futhi bazoqhubeka nokufaka isandla,” kuchaza uMngqithi.
“Kodwa ngemuva komdlalo neMbabane Swallows, kube nzima ukwenza izinguquko ezinkulu.
“Sidlale ngendlela ebesingakaze sidlale ngayo phambilini, sishaya amaphasi angu-855, sakhahlelela nepali amahlandla angu-21.”
UMngqithi uveze ukuthi bekumele abaphumuze oMokoena noMudau ngemuva komsebenzi wabo onzima ngesikhathi semidlalo yamazwe ngamazwe.
Bobabili abadlali badlale imizuzu engu-90 emidlalweni emibili ilandelana kwiBafana.
Ngaphandle kokuphumuza abadlali, lo mqeqeshi ugcizelele isidingo sokwakha ukuzethemba kwamanye amalungu eqembu.
“Kubalulekile ukuthi sithembe bonke abadlali abaseqenjini. Singagcini nje ngokubasebenzisa ngoba nakhu kukhona abangekho.
“Sinemiqhudelwano eminingi kule sizini, futhi sifuna ukugcina wonke umdlali esesimweni futhi ekulambele ukudlala,” kwengeza yena.
Indlela kaMngqithi ikhombisa ukuncintisana okuphezulu namasu okudlalisa abadlali abahlukene kwiSundowns.
ISundowns isidlale kwiMTN8, iCaf Champions League neBetway Premiership.
OLUNYE UDABA: Iseyindida eyomqeqeshi olaxaze iChiefs
Isasalelwe yiCarling Knockout, yiNedbank Cup, i-African Football League neClub World Cup kule sizini.
