Imenenja kaMabasa idalula isithiyo ngokuya kwiPyramids
Sekuvele isithiyo esingase senze kungabi lula ukuthi u-Tshegofatso Mabasa agcine ejoyine i-Pyramids FC yase-Egypt njengoba bekubikiwe.
Imenenja yalo mdlali, uGary Cassisa, isiphawulile ngale mibiko ematanisa lo mgadli nezikaRulani Mokwena.
UCassisa uvumile ukuthi ikhona impela intshisekelo, kodwa akukho okuqinisekisiwe okwamanje.
UMabasa akanalo iqembu ngemuva kokuphela kwenkontileka yakhe ne-Orlando Pirates ngoJuni.
Lo mgadli oneminyaka engu-29 ubudala usefuna iqembu elisha ngaphambi kwesizini ka-2026/27.
Ushiye iPirates eseshaye amagoli angu-50. Lokho kumshiye esele ngamagoli ayisishiyagalombili ukuze afice irekhodi likaBenedict ‘Tso’ Vilakazi.
Muva nje, kubikwe ukuthi angase ajoyine iPyramids FC. Nokho, uCassisa uthe kunenkinga enkulu evimba lesi sivumelwano.
“Mayelana noTshegofatso Mabasa, akukho okuqinisekisiwe okwamanje, kunentshisekelo kuphela,” kusho uCassisa kwiFARPost.
“Inkinga wukuthi eGibhithe amakilabhu avunyelwe abadlali bangaphandle abayisithupha kuphela. IPyramids isisigcwalisile leso sikhala.”
Uthe le kilabhu izoya ekhempini yokulungiselela isizini ngaphandle kwase-Egypt.
- FUNDA NALA | IChiefs imataniswa nowaseZimbabwe
Lokho kusho ukuthi izobuyela ekhaya ngo-Agasti. UCassisa uthe u-Tshegofatso Mabasa akakwazi ukulinda isikhathi eside ukuthi i-Pyramids icacise ngaye.
“Lokho kungase kube yisikhathi eside kakhulu ukuthi singasilinda ukuthi bacacise ngaye,” kusho yena.
- EZISHISAYO| Cofa lapha usithole kuWhatsApp
