Uyahamba, uyahlala kwiPirates? U-Appollis uyaziphendulela

July 29, 2026 1 min read

Isihlabani se-Orlando Pirates u-Oswin Appollis sesiphawule ngamahlebezi asimatanisa nokushiya kuleli qembu aye e-Europe.

Uveze ukuthi ugxile ngokuphelele ekudlaleleni iPirates kule sizini eqala kule mpelasonto.

U-Appollis ujoyine iPirates ekuqaleni kwesizini ka-2025/26 yeBetway Premiership esuka kwiPolokwane City.

IPirates yamnqoba embangwe neMamelodi Sundowns, Kaizer Chiefs namanye amaqembu ase-Afrika ukuze imsayinise.

Lo mdlali wasophondweni ube ngomunye wabagqamile ngaphansi komqeqeshi u-Abdeslam Ouaddou ngesizini edlule.

U-Oswin usize i-Orlando Pirates yanqoba izicoco ezintathu – iMTN8, iCarling Knockout neBetway Premiership.

Udlale imidlalo engu-43 kuyo yonke imiqhudelwano, washaya amagoli angu-12 futhi wakhela ozakwabo ayisishiyagalolunye.

Lokho kumenze wanqoba umklomelo weMidfielder of the Season kuma-PSL Awards ka-2026.

Uphinde waba yingxenye yeBafana Bafana eqophe umlando ngokufinyelela esigabeni somkhumulajezi kwiNdebe yoMhlaba ka-2026.

Ngemuva kweNdebe yoMhlaba, kwaqubuka amahlebezi okuthi angase ajoyine iqembu lase-Europe kuleli windi lokudayiselana ngabadlali.

Ekhuluma neFARPost, u-Appollis uthe akazihluphi ngalokho okubhalwa ngabezindaba.

“Okwamanje angigxilile kulezo zinto. Umsebenzi wami wukudlalela i-Orlando Pirates futhi ngijabule lapha,” kusho u-Oswin Appollis.

“Lezi ezinye izinto ezisemithonjeni yezindaba angizinaki. Njengoba ngishilo, umsebenzi wami ukudlalela iPirates ngoba ngijabule lapha.”