Ezintsha ngoMatuludi obangwa yiBucs naMasandawana

Sekuvele izindaba ezintsha ngomdlali wasemuva wePolokwane City uThabang Matuludi ohalelwa yizinkunzi zakuleli iMamelodi Sundowns ne-Orlando Pirates. 

Ngokombiko wakamuva weFARPost, lo mbango sewunqotshwe yiSundowns njengoba kuthiwa lo mdlali usesayine kuyo.

Kuvele ividiyo yalo mdlali esesikhumulweni sezindiza i-OR Tambo International, kanti kuthiwa ubese ndleleni eya eChloorkop.

Lo mdlali wePolokwane City kuthiwa usevumile ukusayina inkontileka yeminyaka emithathu kwiSundowns ehambisana nombandela wokwelula ngeminye iminyaka emibili.

U-Thabang Matuludi ubebhekwe isikhathi eside yiSundowns ngenxa yezinga lakhe nesimo sakhe njengomdlali wamazwe omhlaba. 

IPirates nayo beyilokhu ivela emaqenjini amhalelayo, kodwa iSundowns isiyishiye incela izithupha, nakuba isanda kusayina uDeano Van Rooyen. 

Ukulimala kwesikhathi eside kukaKhuliso Mudau kwenze iSundowns yangena emakethe ukuze iqinise indawo yasemuva kwesokudla.

UMatuludi ubhekwa njengomdlali wesikhathi eside ozoba yinsika yeqembu, kanti leli thuba lizomnika ithuba lokulwela izindebe zasekhaya neCaf Champions League. 

Nakuba uVan Rooyen enikeza inketho esheshayo, u-Thabang Matuludi omncane ngokweminyaka ubonwa njengomdlali onamandla wesikhathi eside.

• FUNDA NALA | Selikhalile izembe kuMohafe

Lo mdlali ubeyingxenye yeqembu leBafana Bafana kwiNdebe yoMhlaba yakamuva, yize egcine engadlalanga nakanye. 

• EZISHISAYO| Cofa lapha usithole kuWhatsApp