Libambe iPirates lavuka ngabaxhasi elaseMauritius 

I-La Cure Waves SC yaseMauritius ithole uxhaso olusha lwemali ngemuva kokubambana ne-Orlando Pirates emdlalweni wayo wokuqala kwiCaf Champions League.

Okhulumela le kilabhu, uJessen Barbier, uqinisekise ukuthi umdlalo ophele zibambene ngo-0-0 eMauritius uhehe abaxhasi abasha.

Kulaba baxhasi kukhona inkampani yezimoto iSuzuki Axess nesitolo esikhulu i-Intermart.

Ngokuqondana kwezinto. iSuzuki ingomunye wabaxhasi bePirates kuleli.

“Ngemuva komdlalo wethu wasekhaya ne-Orlando Pirates, iLa Cure Waves yamemezela lolu xhaso. 

“Manje sixhaswa yiSuzuki ne-Intermart. Lokhu kwaqala ngosuku esadlala ngalo nePirates,” kusho uBarbier kwiSuperSport.

Uveze ukuthi abaxhasi sebevele basize iqembu ngokulithengela ama-tracksuit, amajezi nezikhwama zokuhamba ngaphambi komlenze wesibili.

ISuzuki nayo ikuqinisekisile ukweseka ompetha baseMauritius, yathi iyaziqhenya ngokusiza iqembu elimele ibhola laseMauritius ezingeni lezwekazi.

I-La Cure Waves isifikile eGoli ngaphambi komdlalo womlenze wesibili ozoba se-Orlando Amstel Stadium ngoMgqibelo.

Oyedwa phakathi kwe-Orlando Pirates neLa Cure Waves usangadlulela esigabeni sesibili ngokunqoba. 

• FUNDA NALA | UMcCarthy uwuqalile oweSabah neMan United

Umdlalo uqala ngo-3 ntambama ngesikhathi saseNingizimu Afrika, kanti ungo-5 ntambama ngesaseMauritius.

• EZISHISAYO| Cofa lapha usithole kuWhatsApp