Bebekuphi oMbuthuma noSibisi? U-Ouaddou uyachaza
Umqeqeshi we-Orlando Pirates u-Abdeslam Ouaddou usechaze ukuthi kungani u-Yanela Mbuthuma noNkosinathi Sibisi bengazange badlale emdlalweni wangoLwesibili.
IPirates ishaye iSekhukhune United ngo 2-0 emdlalweni weBetway Premiership e-Orlando Amstel Arena.
La maqembu aphinde abhekana ezinsukwini ezine nje kuphela ngemuva kokuthi iPirates ishaye iSekhukhune ngo 1-0 emlenzeni wokuqala womdlalo owandulela owamanqamu kwiMTN8.
U-Ouaddou uthe uSibisi ubephunyuziwe njengoba iqembu libheke komunye umdlalo obalulekile neSekhukhune ngoMgqibelo.
U-Yanela Mbuthuma yena ushiywe ngaphandle ngenxa yokushintshanisa abadlali.
U-Abdeslam Ouaddou uthe bekuyisikhathi sokuthi aphumule, bese abanye abagadli banikwe ithuba.
“Kumele siqaphele umthwalo wabadlali. Umsebenzi wethu ukubikezela nokugwema ukulimala.
“Ngakho simphumuzile uSibisi,” kusho u-Ouaddou ngemuva komdlalo wangoLwesibili.
Mayelana noMbuthuma, uthe: “Ube nesikhathi esiningi sokudlala.
“Bekuyisikhathi sokuthi naye aphumule futhi sibone nabanye abagadli.”
U-Ouaddou ugcizelele ukuthi ukushintshanisa abadlali bekubalulekile ngenxa yesheduli eminyene yePirates.
“Bekuyisikhathi esifanele sokwenza izinguquko,” kuqhuba lo mqeqeshi osenemidlalo engu-50 kwiPirates.
Amehlo azoba ku-Abdeslam Ouaddou ukuthi uzombuyisela yini u-Yanela Mbuthuma eqenjini njengoba uBoitumelo Radiopane edlale kahle futhi washaya negoli.
- FUNDA NALA | UMasehe uchaza eyekhadi elikhiphe uKaze
IPirates manje izobheka emlenzeni wesibili womdlalo owandulela owamnqamu weMTN8 neSekhukhune ngoMgqibelo khona e-Orlando Amstel Arena.
- EZISHISAYO| Cofa lapha usithole kuWhatsApp
