Uvuse umunyu u-Olisa Ndah evalelisa kwabe-Orlando Pirates
U-Olisa Ndah usebhale umyalezo osuka enhliziyweni ewubhekise kwi-Orlando Pirates.
Lo myalezo wakhe uqinisekise ukushiya kwakhe kuleli qembu ngemuva asebenze kahle kulo iminyaka emine.
Ngemuva kwesicelo sakhe sokuthi akhululwe ukuze “avuselele umsebenzi wakhe” kwelinye iqembu, lo mdlali oneminyaka ubhale umyalezo wokuvalelisa.
Ungene ezinkundleni zokuxhumana wakhumbula izikhathi ezimenze waba yintandokazi yabalandeli futhi waba yinsika yodonga lwasemuva kumaBhakabhaka.
UMUNYU
Umyalezo kaNdah ube ngaphezu nje kokuvalelisa; ube wukuhlonipha ikilabhu ebe “yikhaya” kuye kusukela efika esuka kwi-Akwa United ngo-2021.
“Ngiyabonga kwi-Orlando Pirates ngethuba lokugqoka ijezi nokumela ngokuziqhenya le kilabhu enomlando…
“Kusukela osukwini lwami lokuqala kuze kube ngolokugcina, le kilabhu ibe yikhaya langempela kimi,” kubhala u-Olisa Ndah.
“Senze izinkumbulo ezingenakubalwa, sabungaza ukunqoba okumangalisayo, futhi sabhekana nezingqinamba ezisenze saba namandla.”
UNdah ukugqamise kakhulu ukwesekwa akuthole kusihlalo u-Irvin Khoza nethimba labaqeqeshi.
Uphinde waba namagama akhethekile awabhekise kubalandeli bamaBhakabhaka abamkhombise ‘uthando nokumethemba’.
“Kubalandeli bamaBhakabhaka, ngibonga uthando nokwethembeka kwenu ngaso sonke isikhathi.
“Ngibonga kakhulu ngothando namandla eniwanika abadlali nsuku zonke,” kwengeza yena.
“Njengoba ngidlulela esahlukweni esisha, ucezu lwenhliziyo yami luyohlala lukhona lapha.
UBHEKEPHI?
Ngenkathi umlayezo kaNdah ukhuluma “ngesahluko esisha,” uyinki okubhalwa ngawo leso sahluko usemanzi.
Yize eke wafunwa yiqembu laseLibya, imibiko yakamuva iveza ukuthi uNdah usebheke eWestern Cape.
- Uziqeqesha neStellies: UNdah uqale ukuzilolonga neStellenbosch FC ngoMsombuluko.
- UHunt uconsa amathe: Umqeqeshi weStellies uGavin Hunt kubikwa ukuthi “uhlola” ukulungela kwalo mdlali wasemuva ukudlala njengoba ebengadlali isikhathi eside kwiPirates.
- Engadlala ngokushesha: Ngemuva kokuthola incwadi emkhululayo ngoJanuwari, uNdah angabhaliswa futhi adlale ngokushesha uma iStellies imsayina.
Ubesehlale iminyaka emine kwiPirates, futhi uNdah wazakhela igama njengomdlali wasemuva oqinile nokwazi ukulibeka phansi ngokukhululeka ibhola.
Nazi izibalo zika-Olisa Ndah kwi-Orlando Pirates kusukela ngo-2021 kuya ku-2026
- Imidlalo ayidlalile ingu-81
- Izindebe azinqobiel zime kanje: Ezine zeMTN8 ezimbili zeNedbank Cup neyodwa yeCarling Knockout.
U-Olisa Ndah ushiya i-Orlando Pirates njengompetha onezicoco eziningi. Kulindeleke ukuthi ajoyine iStellies maduze.
Uma kwenzeka lokhu, umsebenzi wakhe wokuqala omkhulu kuzoba ukusiza ukuvala ukuvuza emuva kwaleli qembu.
FUNDA NALA | Iqiniso ngokushweba kweChiefs uBasadien
Abalandeli sebevele beconsa amathe lapho becabanga ngobudlelwano nakhe noThabiso Moloisane enkundleni.
