Usevalelisile kozakwabo obheke kwi-Orlando Pirates
Omunye wabadlali abasanda kusayinwa yi-Orlando Pirates usebhale umlayezo osuka enhliziyweni ebonga iqembu ‘elimenze umdlali anguye manje’.
UNeo Rapoo usephawulile ngokuhamba kwakhe kwiSiwelele FC, ebhala incwadi yokuvalelisa ngaphambi kokujoyina iPirates.
“Ngibonga abadlali engake ngadlala nabo, abaqeqeshi, abaphathi, abasebenzi nabo bonke abasebenza ngemuva kwezigcawu kwiSiwelele FC,” kubhala uRapoo.
“Kusukela ngosuku lokuqala ngifika kuleli qembu, ngamukelwa ngezandla ezifudumele.
“Ngathola ukwesekwa, ukwethenjwa nethuba lokukhula njengomdlali nanjengomuntu.
“Ngokuhamba kweminyaka, leli qembu seliphenduke umndeni kimi. Linginike izinkumbulo engizozigcina impilo yami yonke.”
URapoo ube namazwi akhethekile ngomqeqeshi uLehlohonolo Seema, athi nguyena odlale indima enkulu ekumakheni waba ngumdlali osefunwa amaqembu amakhulu.
“Ngiyabonga ngokungiqondisa, ngokungithemba nangokukholelwa kwikhono lami.
“Ukungeseka kwakho kube nomthelela omkhulu emsebenzini wami webhola,” kuqhuba yena.
“Kube yisibusiso ukusebenza ngaphansi kwakho futhi izifundo ongifundise zona ngizohamba nazo noma ngabe ibhola lingiyisa kuphi.”
Lo mdlali akabakhohlwanga nabalandeli abebemsekela njalo.
“Ngiyabonga ngokuma nathi kuzo zonke izikhathi. Uthando lwenu, ukwethembeka nokuseseka kwenu kube yisikhuthazo kimi njalo uma ngingena enkundleni ngigqoke leli jezi.”
- FUNDA NALA | Seliqalile izembe likaDa Cruz kwiChiefs
Manje njengoba esebheke kwi-Orlando Pirates, uRapoo ushiya iSiwelele njengomunye wabadlali abathandwe kakhulu ngabalandeli.
- EZISHISAYO| Cofa lapha usithole kuWhatsApp
