URelebohile Mofokeng uzakhele ugazi efeza iphupho lomlandeli
Isihlabani se-Orlando Pirates, uRelebohile Mofokeng sinyuse ukuthandwa kwaso ngabalandeli ngesenzo esikhombise uthando kuleli sonto.
Ufezekise iphupho lomlandeli osemncane ngemuva kokuthi amaBhakabhaka ebukise ngeGolden Arrows eyibhaxabula ngo 5-0.
Lesi senzo esijabulisayo senzeke e-Orlando Amstel Arena ngoLwesibili ebusuku.
Umlandeli osemncane ufike enkundleni ephethe uqwembe olubhalwe ngesandla olusheshe lwadonsa amehlo enkundleni nasezinkundleni zokuxhumana.
“Mofokeng, ngicela uze usayine ingubo yami ngemuva komdlalo,” belubhalwe kanje lolu qwembe lwale ntombazanyana.
Izithombe zale ntombazane ibambe lolu qwembe olunoumyalezo wayo zisheshe zasabalala ezinkundleni zokuxhumana.
Abaningi bebenethemba lokuthi lesi sihlabani esisesincane sizowubona lo mlayezo futhi senze okuthile ngawo.
Nebala uRelebohile Mofokeng akazange aphoxe. Ngemuva kokudlala kwakhe kahle enqoba umklomelo weMan of the Match, ube eseyohlangana nale ngane.
Ube esesayina ingubo yayo njengokucela kwayo. Kodwa ube esenza okungaphezulu kwalokho.
Uyinike ijezi le-Orlando Pirates alisayinile futhi wathatha izithombe nayo ukuyipha isipho cishe engasoze yasikhohlwa.
Lesi senzo sinconywe kakhulu ezinkundleni zokuxhumana, abalandeli beshayela ihlombe ukuthobeka kwale nsizwa eneminyaka engu-21 ubudala.
Njengoba uRelebohile Mofokeng eqhubeka nokukhuphuka enkundleni, yizikhathi ezinjengalezi ezimenza athandeke nakakhulu.
Ufakazela ukuthi akayena nje omunye wabadlali abaphambili ezweni, kodwa futhi ungomunye wezihlabani zalo ezizithobe kakhulu.
