UMngqithi ushintshe unyawo ngesikimu esingajwayelekile
- Sibongiseni GUMBI
Ukushaywa yiPolokwane City ngo 1-0 emdlalweni weBetway Premiership ngenyanga edlule kube yichashaza elibi kuManqoba Mngqithi.
Lo mqeqeshi uvele ubhekene nenselelo yokukwenza abalandeli beMamelodi Sundowns bamethembe njengoba esanda kungena esikhundleni sokucija leli qembu.
Okwenyusa ingcindezi wukuthi ungene ngemuva kokuxoshwa kukaRulani Mokwena okucishe kwaphela isizini edlule engahlulwanga kwiligi.
Nokho yena usheshe wayithola induku njengoba iPolokwane City yavuka ngaye cishe naye engalindele.
UMngqithi wayebophele isikimu esingaqinile kangako kulo mdlalo njengoba ayeshiye ngaphandle abanye babadlali abayiziqongwane zeqembu.
Babengekho oKhuliso Mudau, Teboho Mokoena, Aubrey Modiba noPeter Shalulile kulo mdlalo obungo-Okthoba 27.
Manje njengoba lamaqembu esesheshe aphinde atholana phezulu – osukungokwesithathu kule sizini – uMngqithi ubheke ukubuyisa izinduku.
Umdlalo walamaqembu kulokhu useLoftus Stadium, ePitoli kanti uMngqithi uwuqala ngeqembu elingajwayelekile.
Nakulo mdlalo abekho oMudau noMokoena, kanti noMothobi Mvala noGrant Kekana nabo abekho.
OMarcelo Allende, Modiba no-Iqraam Rayners bona bawuqale ebhentshini lo mdlalo obalulekile.
Uma iSundowns ihlulekile ukunqoba, iPirates izoqhubeka negebe layo esicongweni seligi.
Ukunqoba kweSundowns kulolinciphisa libuyele emaphuzwini amathathu, kanti ukuhlulwa kuzokwenza abe yisithupha.
Ukudlala ngokulingana kuzokwenza abe mane iBucs ehamba ngawo phambili.
Kukholakala ukuthi uMngithi ubaphumuzele umdlalo wangempelasonto weCarling Knockout abazobhekana kuwo neMarumo Gallants.
Zibophele kanje:
- Sundowns: Williams – Morena, Lunga, Khoza, Lebusa – Lethlaku, Maboe, Mkhulise, Maema – Sales, Shalulile.
- Ebhentshini: Onyango, De Reuck, Mdunyelwa, Mashego, Modiba, Saavedra, Allende, Maseko, Rayners.
- Polokwane: Sapunga – Matuludi, Nkwe, Nikani, Nkaki – Kambala, Dlamini, Maphangule, Chauke, Alexander – Appollis.
