UMama Joy ufuna kuxoshwe uMcKenzie ‘ozonda abalandeli’
Umlandeli omkhulu weBafana Bafana uJoyce “uMama Joy” Chauke usekhwele wadilika kungqongqoshe wezemidlalo uGayton McKenzie.
Lo mlandeli usola lo ungqongqoshe ngokuzonda abalandeli kulandela ukuthi umnyango wakhe umemezele ukuthi usuyekile ukuxhasa abalandeli ukuthi bahambele imiqhudelwano.
Lesi simemezelo sisho ukuthi abekho abalandeli abazothunyelwa wumnyango ukuyokweseka iBafana kwiNdebe yoMhlaba eMexico, Canada nase-US ngoJuni.
Lezi zindaba zimxhilile uMama Joy, wabe esezifaka zonke kuMcKenzie ethi kumele kutholakale omunye ungqongqoshe wezemidlalo.
“Kubo bonke abalandeli e-SA asivele sikhohlwe yiNdebe yoMhlaba. U-@GaytonMcK ongu-@MinisterMcK kwa-@SportArtsCultur ngeke akwazi ukusisiza.
“SIsele dengwane. Ake sithandazele ukuthi umengameli asinike ungqongqoshe omusha wezemidlalo ozothanda abalandeli,” kubhala uMama Joy kwi-X.
Omunye wabalaneli, ephendula, uphakamise ukuthi umnyango ubuyekeza umgomo wawo wokuxhasa abalandeli.
Nokho uMcKenzie ukuphikile lokhu, wathi ngeke yena apholise abalandeli abathukuthele ngamanga.
“Kungani kufanele ngiqambe amanga… Inqubomgomo yethu ayibuyekezwa, ngeke ngidukise abantu egameni lokubaduduza,” kuphendula uMcKenzie.
“Ngeke sikhokhele abalandeli abakhulu njengomnyango. Akulungile ngoba i-SA igcwele abalandeli abakhulu.”
UMama Joy uphinde wanxusa umengameli weFifa uGianni Infantino ukuthi asize abalandeli baseNingizimu Afrika ukuthi bayobuka iNdebe yoMhlaba.
“Siyabonga kumengameli we-@FIFAcom u-@GianniInfantino ngokuthi i-@BafanaBafana ingenile kwiNdebe yoMhlaba,” kubhala yena ebhekise kwiFIFA no-Infantino.
“Ngingathanda ukuba lapho. Ngicela noma yiluphi usizo kunoma ubani ukuze angisize ngihambele iNdebe yoMhlaba ka-2026.
“U-@GaytonMcK uvele waqhamuka esethi ngeke abakhokhele abalandeli ikakhulukazi uMama Joy.”
