UBobby Motaung ubona iChiefs isangafika esicocweni seligi
Umphathi webhola kwiKaizer Chiefs, uBobby Motaung, ukholwa ukuthi umjaho wesicoco seligi usavulekile, futhi iqembu lakhe lisenalo ithuba.
Lesi sitatimende usisho ngemuva kokunqoba okugculisayo kwaMakhosi ngo 1-0 ehlula iStellenbosch FC ngoLwesihlanu ebusuku.
Ukunqoba kwenze iChiefs yalala endaweni yesine. Bekungokokuqala inqoba umdlalo weligi ekuhambeni kusukela ngo-Okthoba.
Ngemuva komdlalo, uMotaung, obechichima yinjabulo, ukhulume nabeSuperSport TV.
Ugcizelele ukuthi ikhona inqubekela ohambili kwiChiefs ngaphansi kukaNasreddine Nabi.
Uphinde wenqaba ukuvuma ukuthi asemancane amathuba eChiefs emjahweni wesicoco seligi.
“Iligi ayikapheli,” kusho uMotaung. Ukholwa ukuthi iqembu likhula ngamandla futhi lisengayifaka inselelo esicocweni.
“Kuwuhambo olude, siyazi lokho. Kodwa siyapheka. Kuwumsebenzi oqhubekayo, odinga isineke nesikhathi.
“Ukwakha kuthatha isikhathi, akubi yimpumelelo evele iqhamuke kalula nje. Sisekhona embangweni, iligi ayikapheli.”
IChiefs seyidlale imidlalo engu-17, futhi ilandela ngemuva ngamaphuzu angu-17 eqenjini eliphezulu kwilogi.
Nokho uMotaung akalilahlile ithemb. Uthi abadlali abasha abajoyine leli qembu ngoJanuwari bakhona ukuzosiza iqembu linonkele liye phezulu kwilogi.
“Ake sibone ukuthi bahamba kanjani isizini yonke. Kusesezinsukwini zokuqala.
“Kodwa yingakho sibasayinile, kungesizathu sokuthi sengeze ikhwalithi – yilokho ebesikufuna.
“Besifuna ukusiza abafana abancane ngabanolwazi nekhwalithi, yilokho ebesifuna ukukwenza. Ijezi leChiefs liyesinda kakhulu.
“Kodwa sikwenzela laba bantu (abalandeli), bagcwala inkundla, bezojabulela umdlalo.”
