UMakhanya ucebisa uNdlozi kokuzomenza azinze kwelikhulu
Umqeqeshi weqembu le-Orlando Pirates leDStv Diski Challenge uJoseph Makhanya usehlonze izindawo ezibalulekile okumele uSiyabonga Ndlozi athuthuke kuzo.
Lo mdlali osemncane odlala kwesokudla udlale okokuqala kwiPirates enkulu ngoJanuwari emdlalweni weCaf Champions League ne-Al Ahly.
USiyabonga Ndlozi wangena endaweni kaThabiso Lebitso owayesanda kululama ekulimaleni.
IPirates yanqoba lo mdlalo ngo 2-1, ngamagoli kaRelebohile Mofokeng noTshegofatso Mabasa. Igoli lea-Al Ahly lona lashaywa u-El Shahat.
UNdlozi, oneminyaka engu-22 ubudala, uqale umsebenzi wakhe webhola kwiGolden Arrows KwaZulu-Natal.
Ujoyine isikwati seDDC yePirates ngo-Agasti ka-2022. Ngesizini ka-2023/24, ubolekiswe kwi-Orbit College edlala kwiMotsepe Foundation Championship.
Kulapho efike waqala khona ukudlala esigabeni esikhokhelayo futhi wenza kahle waze wabuyisw yiPirates isizomfaka eqenjini elikhulu.
USiyabonga Ndlozi usedlale imidlalo eyisikhombisa kuyo yonke imiqhudelwano kule sizini.
UMakhanya ukholwa ukuthi kumele asebenzele ukuthuthukisa indlela athatha ngayo izinqumo nokuqaphela izimo zomdlalo.
“UNdlozi uqinile,” kusho uMakhanya kwabeFARPost. “Sisebenze naye kumasizini amabili edlule.
“Manje kufanele athuthukise ukuthatha kwakhe izinqumo nokulawula ibhola. Udinga ukufunda umdlalo kangcono.”
UMakhanya uphinde wagcizelela ukubaluleka komqondo ezingeni lebhola elikhokhelayo.
“Abadlali bahlakaniphe kuleli zinga. Kumele ahlale egxile futhi afunde umdlalo kangcono,” kwengeza uDuku-Duku.
UJoseph Makhanya weluleke uSiyabonga Ndlozi ukuthi kumele asebenze ngokuzikhandla ukuze azinze eqenjini elikhulu.
“Udinga ukungajahi izinto. Kumele avale kahle emuva bese egoba amabhola amahle nangezikhathi ezifanele njengomdlali wasemuva kwesokudla.”
UMakhanya uncome amandla nokulangazelela ukudlala kukaNdlozi, wathi, “Uziqeqesha kahle, yilokho okuhle kakhulu ngaye.”
