UBrian Baloyi uyathimula ngoBvuma ‘ogidagida ndawonye’
Owayengunozinti weKaizer Chiefs futhi eyintandokazi yabalandeli ngesikhathi sakhe, uBrian Baloyi usegxeke ukugidagida ndawonye kukaBruce Bvuma.
UBrian Baloyi ukholelwa ekutheni uBruce Bvuma akakhombisi nqubekelaphambili seloku anyuselwa eqenjini elikulu kuMakhosi.
UBvuma ukhushulelwe eqenjini elikhulu kwiChiefs ngo-2017, kodwa namanje akakathenjwa ngokugcwele ukuthi abe ngunozinti oqala yonke imidlalo.
Nokho njengamanje nguye oqala imidlalo ngaphansi kukaNasreddine Nabi kodwa nakhona akakenzi okwanele ukuthi athenjwe ngokugcwele.
UBrian Baloyi usangabaza ukuthi uBruce Bvuma, oneminyaka engu-29 ubudala, ulapho okufanele abe khona mayelana nesibalo semidlalo ayidlalile.
“Ngesikhathi ngikuleyo minyaka, ngase ngidlale imidlalo engu-250 kwiChiefs,” kusho uBaloyi engxoxweni abe nayo neSoccer Laduuma.
USpiderman, igama uBaloyi ayebizwa ngalo ngezinsuku zakhe zokudlala, ukholelwa ekutheni uBvuma ubengathola ulwazi oluthe xaxa ngaphandle kweChiefs.
“Ngesikhathi uRonwen Williams ethuthela kwiMamelodi Sundowns, wayesedlale imidlalo engaphezu kuka-250 kwiSuperSport United.
“Ukuvimba, ngeshwa, kumayelana nesipiliyoni, futhi leso sipiliyoni nolwazi ukuthola ngokudlala njalo.
“Uma ungadlali njalo kwiChiefs, cishe ungadlala kaningi kwiPolokwane City noma kwelinye iqembu…”
UBvuma useneminyaka ecishe ibe ngu-10 eseqenjini elikhulu laMakhosi kanti uBaloyi unomuzwa wokuthi kufanele ngabe usengunozinti othenjwayo kumanje.
Ukholelwa ekutheni ukulithola kwakhe amacozucozu ijezi kwiChiefs kuphazamise inqubekelaphambili yakhe.
“Ngesikhathi asesihlale kwiChiefs, ukube ubedlalela iChippa United noma iPolokwane City, ngabe usenesipiliyoni esanele sokudlala esigabeni esiphezulu njengamanje.
“Ngalokho bekungeke kube yinkinga kakhulu ukudlalela iChiefs. Kodwa manje usenesikhathi eside ekwiChiefs kodwa akakadlali ngisho imidlalo engu-100.”
UBrian Baloyi usola ukuthi ukungazethembi kungase kube nomthelela ekutheni uBruce Bvuma angabi sezingeni okumele ngabe usekulo manje.
“Ngadlala umdlalo wami wokuqala ngineminyaka engu-19 ngoba nganginomqeqeshi owayekholelwa kimi,” kwengeza uBaloyi.
“Kodwa ukuze umqeqeshi akholelwe kuwe, kufanele abone ukuthi kwawena uyazethemba futhi uyakholelwa ekhonweni lakho.
“Kumele abone ukuthi ungakwazi ukubhekana nengcindezi yokudlala ekilabhini enkulu njengalena.”
