Ulahlekelwe amathuba phesheya ‘obanjiswe udonga’ yiChiefs
Umdlali wakuleli kodwa okhulele phesheya, uLebogang Phiri useveze ukuthi ugcine ephuthwa amathuba emaqenjini aphesheya ngoba elinde iKaizer Chiefs.
Lo mdlali oneminyaka engu-30 ubudala ubesenesifiso sokubuyela kuleli azodlala kwiChiefs, kodwa yagcina imbambise udonga futhi ubona luzogcina luwe naye.
Ekhuluma kwiSports Nights Amplified kwiMetro FM ngoLwesine, uPhiri uveze ukuthi bekunamaqembu abemfuna phesheya.
Uthe uwashaye ngomzimba ngoba esalinde iChiefs njengoba beyimthembisile ukuthi izomsayina, kodwa kuze kube manje usalindile.
“Imenenja yami beyingafuni ukunikezela ngami ngemali encane kuleli,” kusho uPhiri.
“Ukuthatha isikhathi eside ukuthi kubuye impendulo kwenze ngalahlekelwa amathuba phesheya ngoba bengilinde iChiefs. Bengifuna ukudlala kwiChiefs.”
Ube esebuzwa ukuthi kungani engazange ayithinte yena iChiefs – ikakhulukazi uBobby Motaung kwazise unobudlelwane obuhle naye – abuzwe kwenzakalani.
“Naye ubengabuyela kimi angitshele ukuthi, ‘bheka la ntwana yami, ngizamile kodwa kulungi’. Lokho ubengakusho njengobhuti omdala kimi.
“Mina ngikhuliswe ngenhlonipho, bengingeke ngikwazi ukuya kumuntu omdala kunami ngithi kuye, ‘kodwa baba, ungenza njani manje?’.
“Bengizimisele ngeChiefs ngoba yake yangifuna ngabo-2017… Imali abebengifuna ngayo ngaleso sikhathi yayiyinhle kakhulu kwazise ngangisemncane.
“Ukubuya ngize ekhaya ngizohola le mali ababeyibekile ngaleso sikhathi – yayinkulu kakhulu impela.
“Kodwa ngangisenephupho lokuqhubeka nokudlala phesheya ngaleso sikhathi, yingakho ngabachitha ngaya eFrance.”
FUNDA NALA | UMajoro nesifiso esikhulu ngebhola lakuleli
UPhiri – owakhuliswa yiBidvest Wits – usedlale emaqenjini amaningi ehlukene eSweden aseFrance kule minyaka edlule. Njengamanje akanaqembu.
