UKhoza ubusise uMotaung ngo-R2 million ‘wokuzitotosa’

• Intatheli yeLISENETHINI

Usihlalo wePremier Soccer League (PSL) u-Irvin Khoza uncome uKaizer Motaung ngeqhaza lakhe ekuthuthukiseni ibhola elikhokhelayo eNingizimu Afrika.

Emcimbini wokuvulwa komhlangano omkhulu wePSL weminyaka emine eSandton ngoLwesithathu, uKhoza wethule isipho sosuku lokuzalwa sika-R2 million kusihlalo weKaizer Chiefs.

UMotaung ugubhe usuku lwakhe lokuzalwa ehlanganisa iminyaka engu-80 ngenyanga edlule.

“Ngithanda ukucela amalungu e-Exco (Executive Committee) ukuthi anginike imvume yokunikeza uMotaung u-R2 million ukuthi azitotose,” kusho uKhoza.

“UKaizer Motaung usisebenzele kanzima. Ngiyabazi ubuhlungu odlule kubo ukwakha isikhungo esifana neKaizer Chiefs neNSL. 

“Kwangathi uNkulunkulu angakubusisa,” kuqhuba uKhoza ethula lesi sipho esimangalisayo.

UMotaung wasungula iChiefs ngemuva kokuqembuka kwi-Orlando Pirates eminyakeni engu-55 edlule. 

UKhoza noMotaung baba nesandla ekusungulweni kwePremier Soccer League ngo-1996.

IPSL iwuphiko lwebhizinisi leNational Soccer League.

• OLUNYE UDABA: Abaphathi beSpurs bakhulume nabadlali ngoMazinyo

Phakathi kwabahambele lo mcimbi bekukhona indodakazi kaMotaung engumqondisi wezokumaketha kwiKaizer Chiefs, uJessica Motaung.