UHugo Broos ucacisa akubheka kubadlali uma eqoka eleBafana
Umqeqeshi weBafana Bafana uHugo Broos usegcine eyikhiphile imfihlo yakhe ngohlaka alusebenzisa ukuqoka abadlali eqenjini lakhe okuvamise ukususa izinkulumo.
Lo somaqhinga waseBelgium, osanda kuholela iNingizimu Afrika eNdebeni yoMhlaba ka-2026, uthi isimo sengqondo sihamba phambili ohlwini lwezinto azibhekayo uma ekhetha abadlali beqembu lesizwe.
UHugo Broos uhlezi egxekwa selokhu athatha izintambo, ikakhulukazi ngokuziba abadlali abanamagama nabathandwa ngabalandeli.
Isinqumo sakhe sokungababheki kwakubabheka abadlali beKaizer Chiefs simakhele amazinyo abushelelezi muva nje.
Kube nguMduduzi Shabalala kuphela obiziwe, naye engena ngoba esezovala isikhala sikaRelebohile Mofokeng olimele ekhempini yakamuva.
Kodwa ngemuva kokuqeda imidlalo yokuhlungela iNdebe yoMhlaba ngokunqoba iRwanda ngo 3-0 ngoLwesibili, uBroos ukubeke kwacaca ukuthi ubhekani kubadlali.
“Ngiyazi ukuthi abantu abavumelani ngaso sonke isikhathi nokukhetha kwami,” kusho yena. “Kodwa kimi, kulula.
“Ngibheka izinto ezintathu kumdlali: ikhwalithi, isimo sengqondo, nekhono lokulandela imiyalelo.
“Uma ngibuka imidlalo, into yokuqala engiyibukayo kumdlali wumqondo wakhe. Okunye kuza ngemuva.”
UHugo Broos ukholwa ukuthi lokhu kushintsha komqondo kuguqule iBafana Bafana yaba yiqembu elilwayo, elizethembayo, nelinqobayo.
“Manje, sekuyabonakala kuleli qembu — umqondo omuhle wabanqobi,” kuqhuba yena. “Bafuna ukusebenza, bafuna ukunqoba ngaso sonke isikhathi. Lokho yindlela yokuzuza impumelelo.”
FUNDA NALA | OweSpurs usafisa umhlangano nabajoyine iChiefs
Le ndlela kaBroos ithele izithelo ezinhle. Ngokokuqala ngqa kusukela ngo-2002, iNingizimu Afrika ingene kwiNdebe yoMhlaba ngokudlula kweyokuhlunga.
Igcina ukudlala kulo mqhudelwano ngo-2010, yayingene ngokuthi ingosokhaya ngakho ayiyidlalanga imidlalo yokuhlunga.
