UMpengesi ucacisa eyemali ayifuna kwiChiefs ngoNwabali
- Intatheli yeLISENETHINI
Usihlalo weChippa United, uSiviwe “Chippa” Mpengesi, uthi ngamampunge ukuthi wafuna u-R40 million kwiKaizer Chiefs ngesikhathi ifuna unozinti wakhe.
Lesi sikhulu sikuqinisekisile ukuthi nebala bake baxoxa neChiefs ngoStanley Nwabali, kodwa izingxoxo zaphelela eze.
UMpengesi uthi wayelinde iChiefs ibuyele kuye, wamangala seyimemezela ukuthi seyithenge uFiacre Ntwari kwiTS Galaxy.
“Besibheke ukumdayisela iKaizer Chiefs,” ucashunwe esho kanje kwiKickOff kuleli sonto.
“Le ndaba ka-R40 million okwakukhulunywa ngayo, wumbhedo lowo. Ayikaze yaba khona. Amanga aluhlaza.”
Uthe yena wayezoyidayisela ngemali encane ngisho kunale iChiefs okuthiwa iyikhiphele uNtwari kwiTS Galaxy.
“Ngizwa kuthiwa bakhokhe u-R8 million ngalomunye unozinti, kodwa mina ngiyafunga, besizobadayisela ngemali encane kunaleyo.
“Kodwa ke kusobala ukuthi ngokubuka kwabo, lonozinti weTS Galaxy ungcono kunowethu,” kuqhuba uMpengesi.
“Nokho mina la ngikhona, ngiyakuphika lokho. Kodwa sekudlulile konke manje.”
UNwabali uke wamataniswa nanamaqembu aphesheya, ikakhulukazi ngemuva kokwenza kahle kwi-Africa Cup of Nations ngoJanuwari.
OLUNYE UDABA: Kuvela okufiswa uMosimane ngomsebenzi olandelayo
Kodwa kubukeka ezophinde ahlale enye isizini kwiChippa United njengoba lingekho eligcine libeke imali etafuleni ngaye.
