UMngqithi nesinqumo esimangazayo ngezethenjwa zeDowns

• Intatheli yeLISENETHINI

Umqeqeshi weMamelodi Sundowns, uManqoba Mngqithi, uthathe isinqumo esiqinile ngokushiya ngaphandle abadlali ababili abamqoka eqenjini losuku lomdlalo.

Bobabili uKhuliso Mudau noTeboho Mokoena bashiywe ngaphandle eqenjini elizodlala iTshwane Derby ebhekwe ngabomvu.

ISundowns izobhekana neSuperSport United emdlalweni wayo wokuqala wokuvikela isicoco seBetway Premiership eLoftus Stadium ngoLwesibili ebusuku.

Lesi senzo sikaMngqithi simangalisile ikakhulukazi njengoba iSABC Sport ibika ukuthi abalimele oMudau noMokoena. 

Lokhu kukhomba ukuthi abakhethwanga nje kulo mdlalo, okuyisinqumo esihambisana nokuphawula kwakamuva kukaMngqithi mayelana nokuncintisana phakathi kwabadlali. 

Ngemuva kokunqoba kweSundowns ngo 4-0 kuMbabane Swallows kwiCaf Champions League ngempelasonto edlule, uMngqithi ukhulume ngokubaluleka kokugcina izinga eliphezulu kuleli qembu. 

Bobabili uMudau noMokoena bebengekho nakulo mdlalo, kodwa akunakwanga ngenxa yezinga leSwallows. 

UMgqithi ugcizelele ukuthi ukuqhudelana kubalulekile ekugwemeni ukunethezeka kwabathile ekilabhini enkulu njengeSundowns.

“Ukulwa nokunethezeka kwiSundowns, into enkulu esinayo yizibalo esiphezulu sabadlali abasezingeni eliphezulu,” kusho uMngqithi. 

Wengeze ngokuthi abadlali kumele bahlale bezilungiselele ukusebenzisa ngokugcwele amathuba ambalwa abawatholayo. 

“Kuba nzima ukukhipha umdlali owenze kahle, futhi iqembu liwina,” kuchaza yena.

Isinqumo sikaMngqithi sithumela umyalezo ocacile eqenjini wokuthi akekho umdlali, noma ngabe unamandla kangakanani, onendawo yakhe eqinisekisiwe. 

Ugcizelele ukuthi abadlali kumele bahlale benza kahle ukuze bagcine izindawo zabo, njengoba abadlali abancane noma abangaziwa bahlale bemagange ukukhuphuka uma benikezwa ithuba.

Omunye umdlali obemqoka kwiSundowns kodwa obukeka esehlisiwe ngaphansi kukaMngqithi, uThemba Zwane.

UZwane usedlala esuka ebhentshini kusukela kuthathe uMngqithi ekucijeni iSundowns.

UMngqithi uveze ukuthi abanye babadlali abasezingeni eliphezulu kuleli qembu bebengakayidlali imidlalo esezingeni eliphezulu, okungenzeka ukuthi yikhona okudale ukuthi kube noshintsho olukhulu eqenjini eliqala imidlalo.

OLUNYE UDABA: Kuqhume idivosi kwiPirates nomdlali osekhathele yibhentshi

Umdlalo wanamuhla neSuperSport United uzoba yisivivinyo esibalulekile kwiSundowns, njengoba ibheke ukuqala ukuvikela isicoco sayo ngenothi eliphezulu.