UCassius Mailula usize iWydad qede wathola ezimbi ngonina
Njengoba ngeSonto bekubungazwa usuku lomama unhlaba wonke, umgadli weWydad Casablanca uCassius Mailula ubhalele unina, uPinky umlayezo okhethekile.
Ubhale kanje kwi-Instagram wakhe: “Usuku oluhle loMama kuwe Ndlovukazi yami.”
UCassius Mailula ube eseba nomdlalo omuhle neWydad, washaya igoli benqoba ngo 2-0 behlula iRenaissance Zemamra.
Lona bekuwumdlalo wabo wokugcina weligi kule sizini futhi bakwazile ukuthola indawo yesithathu kwiMorocco Botola Pro I.
Lokho kuqinisekise ukuthi bazibekisele indawo kwiCaf Confederation Cup ngesizini ezayo.
Le kilabhu izithole ngaphambi kwalo mdlalo izindaba zokuthi lo mdlali oneminyaka engu-23 ubudala useshonelwe ngunina.
Nokho abaphathi baqoke ukuzigcina kubo. Baze bazethula kuCassius Mailula nozakwabo ngemuva komdlalo.
“Egameni likamengameli nawo wonke amalungu eWydad Athletic Club, sidlulisa amazwi enduduzo kuCassius Mailula ngokudlula emhlabeni kukanina amthandayo.
“Imicabango nemithandazo yethu ikuye nomndeni wakhe ngalesi sikhathi esinzima.
“Kwangathi umphefumulo wakhe ungaphumula ngokuthula,” sifundeka kanje isitatimende esikhishwe yiqembu
UCassius Mailula, odabuka eGa-Molepo eLimpopo, ubenobudlelwano obukhethekile nomama wakhe.
Ngenkathi esuka kwiMamelodi Sundowns ejoyina iqembu le-MLS iToronto FC ngo-2023, unina wajabula kakhulu.
Futhi wazwakalisa ukumethemba ukuthi ukukhuliswa kwakhe ngokuzithoba kuzomsiza akwazi ukuphumelela futhi angadidwa wudumo.
“Ngiyazi ukuthi abanye abantu, uma befika kwelinye izinga, bayashintsha.
“Kodwa ngihlezi ngicela kuNkulunkulu ukuthi angavumi ngendodana yami,” washo kanje unina ngaleso sikhathi.
UMailula unikezwe ikhefu lokubuyela ekhaya ukuze avalelise kahle kunina futhi abe khona uma sekuhlelwa ukufihlwa kwkahe.
Uzobuyela kwiWydad ngemuva kwalokho njengoba leli qembu lizoyodlala kwiFifa Club World Cup ngenyanga ezayo.
