Ucacisa eyokuqhubeka nolizwa ngendaba ijezi kwiChiefs
- Intatheli yeLISENETHINI
Ukweqiwa yijezi kukaThatayaone Dithlokwe kwiKaizer Chiefs akumenzi umdlali omubi, kusho umqeqeshi weqembu lesizwe laseBotswana, uMorena Ramoreboli.
Ukaputeni weZebras uzithole eseqiwa yijezi kuMakhosi ngaphansi kukaNasreddine Nabi, futhi lokhu sekudale ukukhathazeka ngendawo yakhe eqenjini lesizwe.
Kodwa kubonakala sengathi ikusasa lakhe neZebras liselihle okwamanje, uRamoreboli ubonisa ukusiqonda isimo sakhe.
“UThatayaone Ditlhokwe ungukaputeni weqembu lesizwe ozinikelayo njalo uma esekhempini,” kusho uRamoreboli kwabeFARPost.
“Njengoba ibhola liwumdlalo wokuncintisana, akekho umdlali ozozifaka esikimini.
“UDitlhokwe ngeke azikhethe, azifake eqenjini eliqala imidlalo, lokho wumsebenzi wabaqeqeshi.”
URamoreboli uthi uDithlokwe akumele ahlulelwe ngokuthi weqiwa yijezi njengamanje futhi abizwe ngomdlali ongekho ezingeni.
“Uma lokhu kwenzeka ngenxa yezinye izizathu, kufanele sikuhloniphe ukuthi mhlawumbe akayilungile indlela umqeqeshi afuna ukudlala ngayo.
“Akufanele senze iphutha lokuqala ukwahlulela umdlali ukuthi akayena umdlali omuhle.
“Lona ngumuntu owuhloniphayo umsebenzi wakhe futhi osebenza kanzima.
“Uyaqonda ukuthi ‘Ngingase ngingalitholi ithuba lokudlala ezingeni lekilabhu, kodwa ngizoqhubeka nokulwa’.”
URamoreboli ukucacisile ukuthi ukuqhubeka kukaDitlhokwe ukubonakala eqenjini lesizwe kusekelwe kumagalelo akhe abalulekile ekusebenzeni kweqembu.
“Uma uDitlhokwe ezokhethwa ukuthi eze azodlala kuleli (eBotswana), kodwa engazinikeli ngokwanele, angicabangi ukuthi kungaba nesidingo sokuthi siqhubeke nokumbiza.”
