OweSafa KZN ukhathazwa ukundadaza ndawonye kwamaqembu

• Alfred NGUBANE

UKwenzakwakhe Ngwenya, ongusihlalo weSafa KwaZulu-Natal uthi basemkhankasweni wokuqinisekisa ukuthi siyanda isibalo samaqembu akulesi sifundazwe adlala ezigabeni ezikhokhelayo. 

Engxoxweni abe nayo neLisenethini uveze ukuthi basebenza kanzima ukusiza ekutheni okungenani elilodwa lamaqembu adlala kwiMotsepe Foundation Championship liyenyuka liya kwiBetway Premiership.

“Sigcine ngokukhuphula iRichard Bay FC, manje sifuna amanye amaqembu amabili kwiBetway Premiership,” kusho uNgwenya.

“Kumanje ngihambela imidlalo ye-ABC Motsepe League KwaZulu-Natal ukukhuthaza abaphathi bamaqembu.

“Nakhona inhloso wukuthi kube neqembu elilodwa elizodlala kwiMotsepe Foundation Championship ngesizini ezayo. 

“Uzokhumbula ukuthi sagcina ngoThongathi ukubona iqembu laseKZN linyukela esigabeni esilandelayo. 

“Okungikhathazayo wukuthi lamaqembu aphethwe ngezinga eliphezulu. 

“Kodwa okubi wukuthi alikho elidlulela kwiMotsepe Foundation Championship,” kuqhuba uNgwenya. 

Enye yezindlela abazosia ngayo amaqembu e-ABC Motsepe League wukuwengezela izikhathi zokuzilungiselela imidlalo yokuhlunga. 

“Sizosheshe siyivale imidlalo ye-ABC Motsepe League KwaZulu-Natal ngenxa yokuthi kuzoba nemidlalo yamaSalga Games,” kusho uNgwenya. 

• OLUNYE UDABA: Seyiqembukelene iSafa, kukhona abafuna kumiswe ukaJordaan

“Kodwa mangabe sivula isizini sizoqala ngeKZN Primo Cup  khona amaqembu azofudumala.”