UCarol Tshabalala uvuke ngesikhundla esiphezulu kweyobuchwepheshe
Inkampani yamazwe ngamazwe yobuchwepheshe bevidiyo, i-iME isiqoke umsakazi odumile waseNingizimu Afrika uCarol Tshabalala njengesikhulu esiphezulu esibhekelele i-Afrika.
Lokhu kuphawula isinyathelo esikhulu ekukhuleni kwale nkampani ezwenikazi lonke. Lesi simemezelo siqinisekiswe yisikhulu esiphezulu jikelele se-iME uTandi Potgieter.
Uchaze lesi sinyathelo njengengxenye yesu elibanzi lokuqinisa umsebenzi wale nkampani ezimakethe ezibalulekile zamazwe ngamazwe.
I-iME igxile kakhulu kwezobuchwepheshe bevidiyo. Esikhundleni sakhe esisha, uCarol Tshabalala uzohola isu lale nkampani lokukhusa e-Afrika.
Ukuqokwa kwakhe kubonisa inhloso ye-iME yokungena emakethe yase-Afrika eshintsha ngokushesha isimo sedijithali.
Unolwazi lweminyaka engaphezu kwaamashumi amabili kwezkusakaza, uCarol Tshabalala useke wasebenza kwiSABC Sport, iSuperSport nePremier League.
Uphinde wabamba iqhaza ekuhlanganiseni imicimbi emikhulu yezemidlalo emhlabeni wonke jikelele.
Lokhu kumenze wathola ukuhlonishwa njengomunye wezihlabani zokusakaza eziphambili e-Afrika.
“UCarol uyivulandlela, umqambi wendlela, futhi unezwi elithenjwa kakhulu ezwenikazi,” kusho uPotgieter.
“Ubuholi bakhe bukhombisa ukuzibophezela kwethu ekukhuleni sivule namathuba e-Afrika.”
UCarol Tshabalala uthe uzimisele ngokuqhuba izinto ezintsha nokusebenzisana ezwenikazi lonke.
“I-Afrika akuseyona nje imakethe esafufusa; isiyimakethe yobuholi, ithalente nokusungula izinto ezintsha,” kusho yena.
“Ngibheke ngabomvu ukwakha izinkundla ezixhumanisa abantu, izindaba namathuba.”
