UMiguel nomlayezo oshubile ngaphambi koweChiefs neSundowns
U-Inácio Miguel usewubeke wacaca umyalezo weKaizer Chiefs ngaphambi komdlalo omkhulu neMamelodi Sundowns ngoMgqibelo.
Lo mdlali wasemuva uthi Amakhosi azongena eFNB Stadium engesabi muntu, noma ngabe abhekene namaqembu amakhulu kangakanani.
UMiguel ukhulume nabezindaba eKaizer Chiefs Village eNaturena ngoLwesine, wakubeka kwacaca ukuthi Amakhosi afuna ukunqoba umdlalo wesithathu weligi kulandelana.
IChiefs iyiqale kahle isizini. Amakhosi anqobe iKruger United emdlalweni wokuqala weligi, ngaphambi kokushaya iSekhukhune United ngoLwesithathu.
Lokhu kuyibeke phezulu etafuleni ngamaphuzu ayisithupha emidlalweni emibili.
U-Inácio Miguel uyavuma ukuthi iSundowns kufanele ihlonishwe kodwa uthi i-Kaizer Chiefs izimisele ukwenza kahle.
AmaBrazilians asanda kunqoba iCaf Champions League okwesibili emlandweni wawo.
Nokho, lo mdlali uthi lokho akusho ukuthi iChiefs kufanele ibesabe labo mpetha base-Afrika.
“Okokuqala kumele sihloniphe iSundowns. INingizimu Afrika kumele iyihloniphe ngoba ingompetha base-Afrika,” kusho uMiguel.
“Kodwa akumele sikhohlwe ukuthi singobani. Nathi sinawo amandla okuyishaya iSundowns.”
Uthi iChiefs kumele igxile emandleni ayo kunokuchitha isikhathi icabanga ngeSundowns.
UMiguel uphinde wathi uFernando da Cruz ubanikeze umyalezo ocacile.
“Umyalezo ucacile: asesabi muntu, noma ngabe bangompetha beChampions League noma bePSL,” kusho yena.
Uthi Amakhosi azobhekana neSundowns ngendlela abhekane ngayo neSekhukhune.
“Siqala umdlalo ngesifiso esifanayo, ngomoya ofanayo wokulwa futhi sene kahle kuzo zonke izimo zomdlalo. Yilowo myalezo womqeqeshi.”
- FUNDA NALA | IPirates isimtholile unozinti ebimfuna
Lo mdlalo uzoba ngoMgqibelo ngo-3 ntambama eFNB Stadium.
IChiefs izongena kulo mdlalo ihlezi esicongweni seBetway Premiership, kanti ukunqoba kuzoyenza iqhubeke nokwakha umfutho ekuqaleni kwesizini.
- EZISHISAYO| Cofa lapha usithole kuWhatsApp
