I-Orlando Pirates seyiphinde yaqinisa ngomunye umdlali

Sekube nomnyakazo omuhle kwi-Orlando Pirates ngonozinti osemncane ebimfuna kwiStellenbosch FC njengoba iqhubeka nokuqinisa iqembu.

Kuvela ukuthi iPirates isiqedile ukusayinisa unozinti osemncane waseStellenbosch FC uDublin Boon.

Ngokubika kwe-iDiski Times, lo nozinti oneminyaka engu-21 ubudala usayine inkontileka yeminyaka emithathu namaBhakabhaka.

UBoon wajoyina iStellenbosch ngo-Agasti nyakenye esuka kwiWellington Phoenix yaseNew Zealand.

Ngesizini yakhe yokuqala eNingizimu Afrika, lo nozinti ubesetshenziswa kakhulu njengonozinti eqenjini leDStv Diski Challenge.

UBoon ubekade emataniswa nesivumelwano esikhulu sokushintshana phakathi kwePirates neStellenbosch.

Leso sivumelwano besizobona uBoon noFaiz Abrahams beya kwiPirates, bese uKabelo Dlamini yena eya kwiStellies.

Nokho, leso sivumelwano sagcina singaphumelelanga ngemuva kokuthi uDlamini enqume ukungayi kuleli qembu likaGavin Hunt.

U-Abrahams yena usegcine usejoyine iKaizer Chiefs ngokubolekiswa, kodwa i-Orlando Pirates yona isigcine imtholile uBoon.

Ukufika kwakhe kuza ngesikhathi amaBhakabhaka eqinisa konozinti kulandela ukudedelwa kukaMelusi Buthelezi, osejoyine iSekhukhune United.

• FUNDA NALA | U-Ouaddou neyisuyekezo ngoNduli

Njengamanje, amaBhakabhaka asenabanye onozinti abancane okubalwa kubo uSiyabonga Dladla, 25, no-Ethan Visagie, 21.

Ukusayinwa kukaBoon kumnikeza ithuba elikhulu lokuzakhela igama kwelinye lamaqembu amakhulu ebholeni laseNingizimu Afrika.

• EZISHISAYO| Cofa lapha usithole kuWhatsApp