UMcKenzie weseka uMbule, umeluleka ngokumele akwenze
Ungqongqoshe wezemidlalo, uGayton McKenzie useseke esidlangalaleni umdlali we-Orlando Pirates uSipho “Masterchef” Mbule.
Ukwenze lokhu ngemuva kokuthi lo mdlali esale ngaphandle eqenjini likaHugo Broos azoqoka kulo aya nalo kwiNdebe yoMhlaba.
UBroos umemezele isikwati sakhe ngoLwesine ebusuku.
Ukusala kuka-Sipho Mbule kube ngenye yezinto okukhulunywa ngazo kakhulu.
Abanye bebemzwela, abanye bemhleka ngalokhu kusala kwakhe.
Phela abaningi abakakhohlwa ngesikhathi echoma eqeda kunqonba iMTN8 efika kwiPirates.
Ngaleso sikhathi wayenza kahle waze wabuyela kwiBafana futhi wahamba nayo ukuya kwi-Afcon eMorocco ngoDisemba.
Kodwa kusukela lapho, izinto azihambanga kahle njengoba eselizwa ngendaba ijezi kumaBhakabhaka.
Kodwa noma kunjalo, u-Gayton McKenzie usakholelwa ku-Sipho Mbule futhi umbona esazokwenza okuningi okuhle.
“Inkosi eyasinika okuningi, lesi yisikhathi sakho sokusikhombisa ingxenye yesibili yobukhulu bakho,” kubhala u-Gayton McKenzie ku-X.
“Iminyaka yakho engcono kakhulu isengaphambi kwakho ebholeni. Ziyeke iziwula zikuhleke, usenzele okukhulu wena.”
Lo myalezo kangqongqoshe usuvuse ukwesekwa kwabanye abalandeli abakholwa wukuthi uMbule usenokuningi angakwenzela iPirates neBafana Bafana.
