U-Ouaddou nesicelo ngoDansin ogile izimanga kwiPirates
Umqeqeshi we-Orlando Pirates, u-Abdeslam Ouaddou, usekhiphe isexwayiso esiqinile ngemuva kokuthi u-Camren Dansin egqame ngendlela emangalisayo emdlalweni wokuvula isizini yeBetway Premiership.
Lo mdlali oneminyaka engu-21 ubudala uqokwe njengoMdlali oVelele ngesikhathi iPirates ishaya iMilford FC ngo 2-0, okwenze abalandeli baqala ukukhuluma ngaye njengesihlabani esilandelayo seBhakabhaka.
UDansin uqede ngempumelelo amaphasi angu-36 kwangu-40, wakha amathuba amabili okushaya amagoli.
Lokhu kuza ngemuva kokuthi ngesizini edlule edlale imidlalo engu-16 eqenjini lokuqala futhi wanqoba umklomelo weGoli loNyaka kwiBetway Premiership ngegoli lakhe elimangalisayo alishaya bebhekene neMamelodi Sundowns.
Nokho, yize abalandeli sebebona u-Camren Dansin njengomdlali omkhulu wakusasa, u-Abdeslam Ouaddou uthi abantu kumele behlise umoya.
“Kumele siqaphele kakhulu. Lo mfana wenza kahle kakhulu, kodwa asijahanga ukumfaka eqenjini lokuqala.
“Abantu babengaqondi ukuthi kungani silindile, kodwa sasazi kahle ukuthi senzani,” kusho u-Ouaddou.
Lo mqeqeshi uthe iPirates ngeke ivumele ukuthi ithalente likaDansin lisheshe lifakwe ngaphansi kwengcindezi enkulu.
“Awulifaki emlilweni ithalente elinjengaleli. Kumele izinto zihambe kancane kancane,” kuqhuba yena.
“Usekhombisile ukuthi unekhono, kodwa kusekuningi okusamele akufunde ukuze afinyelele ezingeni eliphezulu.”
U-Abdeslam Ouaddou uphinde wanxusa abalandeli nabezindaba ukuthi bayeke ukumtusa ngokwedlulele u-Camren Dansin.
“Kumele ahlale ethobekile futhi angalaleli umsindo wabantu abangaphandle kwekilabhu.
- FUNDA NALA | Kuvela ezingezinhle ngoShabalala kwiChiefs
“Umsebenzi wethu njengabaqeqeshi, owekilabhu nowabezindaba ukuvikela leli thalente.
“Uma eqhubeka nokusebenza kanzima futhi ehlala ezithobile, uzoba ngomunye wabadlali abakhulu,” kusho u-Ouaddou.
- EZISHISAYO| Cofa lapha usithole kuWhatsApp
