UZwane ususe umsindo ‘ebhuqa’ uHunt

Umqeqeshi waMaZulu FC, u-Arthur Zwane, usesuse umsindo ezinkundleni zokuxhumana ngemuva kwevidiyo emkhombisa ‘ebhuqa’ umqeqeshi weStellenbosch FC, u-Gavin Hunt.

Le vidiyo, okukholakala ukuthi iqoshwe ngesikhathi noma ngemuva komdlalo obuseSugar Ray Stadium ngoMgqibelo, isheshe yasabalala ezinkundleni zokuxhumana ngemuva kokunqoba kwaMaZulu ngo 1-0.

Usuthu luqoqe amaphuzu amathathu ngenxa yegoli likaThando Ngwenya alishaye ngephenathi esiwombeni sesibili, kodwa amazwi kaZwane yiwona asephenduke undabamlonyeni.

“Kukhona abasidelelayo Jobzisto,” kuzwakala uZwane esho kanje eya kohlala ebhokisini lokuqandisa iziphuzo. 

Okunye akusho ngemuva kwalokho akuzwakali kahle kule vidiyo kodwa ngathi uyaqhubeka nokubhuqa.

Yize u-Arthur Zwane engalishongo igama lomuntu abekhuluma ngaye, abalandeli abaningi bakholwa ukuthi ubebhekise ku-Gavin Hunt.

Laba baqeqeshi bake basebenza ndawonye kwiKaizer Chiefs ngaphambi kokuba kubikwe ukuthi ubudlelwano babo bonakala.

Lokho kwaphinde kwavela obala ngo-2023 ngesikhathi uZwane exoshwa njengomqeqeshi weChiefs. 

Ngaleso sikhathi uHunt wabhala ku-X igama elithi “LOL” ehambisana ne-emoji ehlekayo. Kodwa wabuye wawususa lowo mbhalo.

• FUNDA NALA | U-Ouaddou nesicelo ngoDansin

Yize kungekho bufakazi bokuthi u-Arthur Zwane ubekhuluma ngo-Gavin Hunt, umlando phakathi kwalaba baqeqeshi wenze abalandeli basola ukuthi ubegadla kuye.

Buka le vidiyo ngezansi:

• EZISHISAYO| Cofa lapha usithole kuWhatsApp