Sekumiswe izifunda zeSafa ezigqishe kuZungu
Izifunda ezine ze-Safa kuthiwa sezivinjelwe ukubamba iqhaza kwinfomfa yokuvota yangoMgqibelo, okwehlise izifunda ezivotayo zisuka ku-52 zaya ku-48.
Lokhu kwenzeka nje ushubile umbango wokwengamela le nhlangano phakathi kukaDanny Jordaan noSandile Zungu.
Lezi zifunda okuthiwa sezimisiwe yi-Amajuba neHarry Gwala KwaZulu-Natal, iSarah Baartman e-Eastern Cape nePixley ka Seme eNorthern Cape.
Ithimba likaZungu lithi lezi zifunda beziseka umkhankaso wakhe wokuketula uJordaan.
ISouth African Masters and Legends Football Association (SAMLFA) nayo imiswe amalungelo obulungu nawokuvota, okuyinto elimaze ukwesekwa kukaZungu.
Ingqungquthela iseVodacom World eMidrand. Izifunda ziphethe amavoti amane ngasinye, kanti amalungu ahambisana neSafa, amalungu asele eNEC nePSL njengelungu elikhethekile nawo ayavota.
Ozowina udinga amavoti angu-51%. UMagisela Mzobe we-Safa ubikezele ukunqoba okulula kukaJordaan.
Uthi isibalo sakamuva simnikeza izifunda ezingu-34 neningi lamalungu eNEC angu-41 uma kuqhathaniswa nezingu-18 zikaZungu.
Ithimba likaZungu lisola ukuthi izifunda ezifuna ushintsho zijeziswa ngokuhlolwa kokuhambisana nemithetho nokuhoxiswa kwazo ngomzuzu wokugcina.
UJordaan, oneminyaka engu-75, usehole iSafa kusukela ngo-2013 futhi ufuna ihlandla lesine manje.
- FUNDA NALA | Kuvela ongabuka khona iPirates
UZungu, oneminyaka engu-59, ungusihlalo waMaZulu FC neSizekhaya Holdings futhi umele ukubuyisa ukuphathwa kahle kwale nhlangano, nebhola lezikole.
I-Safa ithe ukuvota kuzokwenzeka ngoMgqibelo ngaphansi kohlelo lokufihlwa kwevoti lalowo nalowo ovotayo.
- EZISHISAYO| Cofa lapha usithole kuWhatsApp
